ينفع تحب حد ماستاهلكش؟
آه، ينفع جدًا… وبيحصل كتير.
تحب حد من قلبك، وتدي، وتسامح، وتبرر، وتعدّي،
وفي الآخر تكتشف إن اللي قدامك ماكنش بيشوفك زي ما إنت شايفه…
لا بنفس الحب، ولا بنفس القيمة.
فيه حد بيحب بزيادة، وحد بياخد ده كأمر واقع.
فيه اللي بيصبر ويفهم ويكمل لوحده،
وفيه اللي وجوده خفيف… وإن غاب، ماحسش حتى بفراقك .
المشكلة مش فيك…ولا في إنك حبيت،
ولا في إنك اتعلقت،
ولا حتى في إنك فضلت متمسك بمشاعر مش راجعة لك بنفس القوة.
المشكلة إنك كنت إنسان أوي، في وقت كان المفروض تبقى حذر، كنت صادق وسط ناس بتلعب ،كنت واضح في زمن بيخاف من النية السليمة.
يمكن هي ماستاهلتكش، يمكن هو ماستاهلكش…
مش لأنهم وحشين،
لكن لأنك إنت كنت أصدق، أحن، انت كنت بتحب بجد… وهما كانوا بيعيشوا اللحظة.
بس الحب مش كفاية،
النية لوحدها مش ضمان،
والقلب اللي بيدي من غير ما يترد له، بيتعب…وبيتعلم.
خلي وجعك دليل مش حُكم مؤبد.
خلي مشاعرك الكبيرة نعمة، بس ماتديهاش للي مايستاهلش.
ماتلومش نفسك إنك كنت زيادة…
لكن أوعى تكرر نفس الزيادة في حد ناقص.
فيه ناس ماكانتش ليك،
مش عشان إنت مش كفاية،
بس عشان هما ماعرفوش يحبوا حد كفاية.
وفي الآخر،
مش كل حد بنحبه لازم نكمّل معاه…ومش كل وجع معناه إننا غلطنا.
أوقات بنحب صح… بس الشخص غلط.
وأوقات بندّي كتير… بس في الوقت الغلط.
بس إحنا بنتعلّم ،وبنقوى، وبنعدي .
والمرة الجاية،مش هنبطل نحب…
بس هنعرف نحب صح.
