بتكسف أغني قدام والدي.. فتحي مصطفى كامل يتحدث عن بداية مشواره بالغناء|خاص

تحدث المطرب الشاب فتحي مصطفى كامل، نجل الفنان مصطفى كامل، نقيب المهن الموسيقية، عن بداية مشواره الفني في الغناء، والذي انطلق بأغنية يلا ندلع، قبل أن يتجه مؤخرًا لتقديم بودكاست روقان.

قال فتحي مصطفى كامل في لقائه مع نيوز رووم، إنه درس الإعلام وتخرج في جامعة MSA، مشيرًا إلى أنه يحب الغناء منذ طفولته، لكنه قرر أن يطرح أولى أغنياته العام الماضي بعد تخرجه في الجامعة، موضحًا أنه كان يحضر لذلك دون علم والده.

بتكسف أغني قدام والدي

وأضاف فتحي مصطفى كامل:"أنا مشكلتي إني بتكسف أغني قدام والدي مصطفى كامل، ممكن أغني قدام أي حد في الدنيا لكن لما أشوفه بحس إني معنديش زور وبحس برهبة.. وهو نفسه بيستغرب من كسوفي".

وتابع نجل نقيب الموسيقيين: "السنة اللي فاتت كنت بجهز تراك من وراه، ولكن أختي الصغيرة راحت قالت له.. ولما خلصت الأغنية وسمعتها له قال لي: مش عاوز بدايتك تكون دراما، وبدأنا نعمل ورشة صغيرة، نقعد كل يوم يكتب ويقول لي وأنا اتكسف أغني قدامه، لحد ما وصلنا للأغنية".
 

أما عن تجربته في البودكاست، فقال: “كنت عاوز ابدأ من زمان وأنا في الكلية، لكني مكنتش واخد الموضوع بجدية، وكنت فاكر الموضوع سهل، لكن الموضوع كان له تحضيرات كتير، ومرة قاعد مع صاحبي قلت له وسمع مني، ولما روحت لقيته بيكلمني وجهز كل حاجة، فحسيت اني اتخطفت وبدأ الموضوع يدخل في الجد.. عكس أي حد سمع مني، وده كان من أكتر الأسباب اللي شجعتني”.

وأكد فتحي مصطفى كامل أنه لا يفعل أي شيء دون الرجوع لوالده، قائلًا:" مش بعمل اي حاجة غير لما ارجع له وبيختار معايا أغاني الكلمات.. وأحيانًا بيعترض اعتراض أب وبيقول لي: أنا عاوزك احسن واحد في الدنيا.. ولو مش هرجع له هو هرجع لمين يعني".