احنا اللي بنعمل القانون .. زينة تكشف علاقة النائب الجارحي بـ عقر كلب لنجلها

كشفت الفنانة زينة قصة تعرض نجليها لعقر كلب على يدّ أحد سكان الكمبوند؛ قائلة: «اللي حصل إن نزلت أولادي عند الملعب هو جنب البيت كان لوحدهم وسبتهم ورحت السوبر ماركت، فجأة لقيت تليفون ابني بيصوت الحقيني يا ماما فيه حد معاه كلب وانا اتعورت».

بداية الواقعة

وأضافت الفنانة زينة خلال مداخلة هاتفية ببرنامج “الحكاية” والمذاع عبر قناة “ام بي سي مصر” تقديم الإعلامي عمرو أديب: «بيقول لابني عاوز ألعب قاله تعالا نلعب مع بعض قاله لا دا أنا معايا ناس، قاله طب هعرف اخرجك إزاي وساب الكلب عليه، طبعا جيت جري لقيتهم في مكتب الأمن، وقالوا إن مشرف الأمن شاف الواقعة».

وأوضحت: «لقيت المشرف واقف وقولتله فيه أي قالي هو دا الواد اللي ساب الكلب على أولاد حضرتك، قولتله انت مين أو ابن مين قالي البيت اهو، قولتله وديني عند أمك، أي حد في الدنيا عنده كلاب مش بيخرج الكلب مع أولاد صغيرة».

واستكملت الفنانة زينة: «الواد دخل البيت ولقيت واحدة طالعة بتشتم وانتي وانتي، قولتلها جيالك علشان أقولك اللي حصل، انتي جايه تعتدي علينا في بيتنا، وانا برا البيت، وجوزها بيسكت فيها وهي مش عاوزه تسكت».

تحرير محضر 

وأشارت: «المهم طلبت النجدة ووزارة الداخلية ما اتاخرتش وبعتوا كل حاجة لما عرفوا إن الموضوع كلب، وانا مش هستنى لما تحصل لابني حاجة، وعملت البلاغ والراجل قالي هروح اجيب الواد والناس والكلب ونطلع على القسم».

وأكدت زينة: «قولتله حاضر اتصلت على اخويا، لقيت 3 رجاله واقفين أنا النائب محمد الجارحي وانا النائب حسام الجارحي وانا النائب كذا، قولتله ليه النائب قبل الاسم، أنا بقول زينة مش الفنانة زينة».

مشاجرة القسم

وأكملت الفنانة زينة حديثها عن الواقعة؛ قائلة: «اعتذروا للواد وقولتلهم الواد يعتذر للولد، قالولي مش بنطلع ولادنا أقسام، تحت نبقى نخليه يعتذر، وما اعرفش هو مين ولا ابن مين».

واستطردت: «الست نزلت من العربية اوعى يا آدم تعتذر، قولتلها هو اعتذر، قالتلي يعتذر لمين، وانتي مين، وفجأة اتحول المحضر إداري».

وأكملت زينة: «واحنا في القسم لقيت إن وانا بقوله سيادة الرئيس مطلع قانون علشان الكلاب والأطفال قالي احنا اللى بنطلع القوانين، قولتله يعني بتعملوا القوانين دي علشان يطبق علينا كعامة الناس؟».

التوجه للمستشفى وعمل التقرير الطبي

موضحة: «اتهموني إني بجري بالعربية علشان ادوس الولد، على أساس إني مجنونة هدوس الولد وانا عندي زيه، وروحت المستشفى عملت تقرير طبي».

وناشدت الفنانة زينة: «عاوزه حق ابني وبطالب إن يكون فيه شفافية، احنا في دولة قانون ومتعودة دائما إني باخد حقي بالقانون، وبناشد السيد رئيس الجمهورية بإنه يضع حد للي معاهم فلوس وحصانة».

واختتمت الفنانة زينة: «العيال كان عندهم امتحان النهارده ما رحوش المدرسة، ومن ساعتها مش عارفين يناموا».