حمو بيكا مدافعًا عن حسن شاكوش: "لازم تسمعوا ولا للتنمر"
خرج مطرب المهرجانات حمو بيكا عن صمته ليرد على منتقدي حسن شاكوش بعد أزمته الأخيرة، حيث نشر منشورًا عبر حسابه الرسمي على موقع التواصل الاجتماعي فيسبوك، وقال من خلاله: “من فضلكم لازم تسمعو ولا للتنمر .. اللي بيهزر وبيتريق على حسن شاكوش عشان صوته تعبان .. أحب أقولكم حاجة: الرجولة مش بس صوت .. الرجولة مواقف وصمود وشغل وتعب وشقى عشان يوصل! .. شاكوش أخويا، صاحبي، عشرة سنين .. راجل شاف كتير ولسه واقف على رجليه.. بيغني وهو تعبان، وبيعافر وهو مجهد .. وده مش ضعف .. ده قوة قلب ومعدن أصيل! .. المطرب الحقيقي مش اللي صوته حلو وهو مرتاح .. المطرب الحقيقي هو اللي بيغني من قلبه حتى لو صوته مجهد .. وبيفرّح الناس حتى لو هو موجوع! .. الناس اللي قاعدة ورا الكيبورد تتريق؟ .. ولا واحد فيهم يقدر يوقف دقيقة مكان الراجل ده في حياته! .. أنا واقف معاك يا شاكوش لآخر نفس .. وكلنا عارفين إنك راجع أقوى .. وده وعد من حمو بيكا قدام الدنيا كلها!”.
أزمة حسن شاكوش
وقد نشر مطرب المهرجانات حسن شاكوش مساء أمس مقطع فيديو من إحدى حفلاته الأخيرة “إحياء حفل زفاف نور التوت” عبر حسابه الرسمي على كموقع التواصل الإجتماعي فيسبوك، وعلق قائلًا: "حبيت أوضح حاجة بس .. أنا مبحبش أطلع وأبين إني تعبان .. وأقول علي التعب اللي في صوتي والأحبال الصوتية عندي عامله كده في صوتي ومخلياني مش قادر أتكلم .. بس ده كان فرح أخويا الصغير " نور التوت" وكان لازم آجي على نفسي وأغني .. لكن مقدرتش زي ما أنتم شايفين .. عشان بس الفديوهات منتشرة والناس بتتريق وده من حقكم طبعا .. بس الواحد لما بيجيله دور برد عادي مابيقدرش يتكلم أصلا وده الفيديو كمان عندي أهو".
محكمة الأسرة تحكم على حسن شاكوش
في سياق منفصل، قد ألزمت محكمة الأسرة ب أكتوبر حسن شاكوش بأداء 950 ألف جنيه كنفقة عدة ومتعة لطليقته ريم طارق، بعد انفصالهما، ويأتي الحكم نهائي واجب النفاذ، ويجب على حسن شاكوش دفع المبلغ الصادر في الحكم، وإذا لم يدفع المبلغ سيتم حبسه طبقًا للقانون “الدفع أم الحبس".
