كنت بتلعب دور الأب معايا.. منشور مؤثر من نجل راندا البحيري في عيد ميلاد جده

في منشور مؤثر، هنأ ياسين الأشروبي، نجل الفنانة راندا البحيري والإعلامي سعيد جميل، جده من والدته بمناسبة عيد ميلاده، معبرًا عن امتنانه لدوره الكبير في حياته، مشيرًا إلى أنه كان بمثابة أب.

وكتب نجل راندا البحيري في منشوره: “جدو حبييي.. كل سنة وأنت طيب يا بشمهندس يا كبير.. ياللي كبرت لقيت نفسي في حضنك و افتكرتك أبويا.. طول الوقت كنت بتلعب دور الأب معايا.. ومحرمتنيش من أي نصيحة ووقفت جنبي طول الوقت”.

وأضاف نجل راندا البحيري: “عرفتني حاجات كتير وأول كمبيوتر أنت اللي اشتريتهولي وعرفتني إزاي أركبة قطعة قطعة.. ولما كنت بجنن أمي علشان مش عايز آكل كانت بتتصل بيك علشان تيجي تأكلني، وكنت فعلا بتيجي من بيتك علشان تأكلني وتنزل علشان ماما عارفة اني هسمع كلامك”.

واختتم نجل راندا البحيري منشوره كاتبًا:" كل سنة وأنت طيب يا جدو يا حبييي وربنا يخليك لينا ويخليك لماما ولكل اللي بيحبوك".

راندا البحيري تهنئ والدها بمناسبة عيد ميلاده 

كما هنأت راندا البحيريث والدها بعيد ميلادها حيث نشرت صورة تجمعهما سويًا عبر حسابها بموقع انستجرام: “بابا كل سنة وأنت طيب يا حبيب قلبي ربنا يباركلك ويحفظك ويسعدك ويخليك لينا أنا وأحمد وروض وحبيبة وحفيدك ياسين القمر Yaseen elashrouby ياسين بيقولك كل سنه وأنت طيب يا جدو”.

وأضافت:" ربنا يمد في عمرك و يديك من فضلك واللي ميعرفش بابا فايته كتير بصراحة بابا من أكتر الشخصيات اللي ممكن تفيدك.. مستشار شاطر جدا، مهندس معماري مفيش زيه.. هو اللي بني مسرح الهرم للأستاذ فاروق صبري رحمة الله ((فرقة الفنانين المتحدين)) ومسرح وسينما كوزموس بعماد الدين ومباني تانيه كتير جدًا مهمة في القاهرة كلها إدارية وتجارية ((مش عمارات))".

وأكملت:"اشتغل في الهندسه سنين و كان في نفس الوقت تاجر سيارات مهم جداااااا وكل سوق السيارات يعرفوه و أصدقائه، دخل عربيات بعينها مصر مكانتش موجوده عندنا و خد توكيلات كتيره في التسعينات، ابن بار لأمة الله يرحمها و يجمعنا بيها في الجنة يارب اللي هي جدتي طبعا روض حسن.. بحبك يا بابا".