شريف مدكور: عادل إمام مدرسة في التمثيل وليس مجرد كوميديان.. وأعماله لا تُسعدني

تحدث الإعلامي شريف مدكور، عن رأيه في الأعمال الفنية للزعيم عادل إمام، مؤكدًا أن تقييم الجمهور للفنان الكبير يختلف تمامًا عن نظرته الخاصة له، إذ لا يعتبره مجرد فنان كوميدي يهدف لإضحاك الجمهور، بل يرى فيه مدرسة متفردة تقدم رسائل فكرية ومواقف إنسانية عميقة تُلفت انتباه المشاهد وتدفعه للتفكير في سلوكه وتصرفاته.

تصريحات شريف مدكور 

وقال مدكور خلال حلقة من برنامج "4 شارع شريف"، الذي يُعرض عبر قناة الحياة: "لما بتفرج على الفنان الكبير عادل إمام مش بيضحكني زي الناس. هو بالنسبة لي مش كوميديان، هو شخص بيفوقني بكلامه في الأعمال، بمواقف تلفت نظري لحاجات كتير، وده شيء مش بسيط".

وأضاف: "أنا أصغر بكتير من إني أقيم فنان بحجم الزعيم، لكن الحقيقة هو حاجة تانية خالص، ومدرسة لوحده في التمثيل. الناس بتفتكر إن أعماله مجرد كوميديا للضحك، لكن أنا شايف إنها بتعلمنا إزاي نتصرف، وده بيخليها مختلفة جدًا عن الكوميديا السطحية".

في سياق مختلف، استنكر شريف مدكور بشدة قيام إحدى السيدات بنشر شائعة عن وفاته، ما تسبب في حالة من الهلع لأسرته، وعلى رأسهم والدته، التي شعرت بالخوف الشديد فور سماعها للخبر الكاذب.

وقال مدكور في مقطع فيديو نشره عبر حسابه الرسمي على موقع "فيس بوك": "فيه ست عاملة فيديو بتقول فيه إني توفيت بعد وعكة صحية. أنا عرفت الشائعة دي لما كلمت أمي ولقيتها مذعورة ومخضوضة عليا. تتخيلوا إحساس أم تشوف خبر وفاة ابنها؟! أنا عايز أفهم، أنتي مالك؟ إيه اللي يخليكي تعملي كده؟".

وتابع قائلا: "للأسف أنا شخص مؤدب، مش هقدر أشتمك ولا أهينك، لكن هقاضيك، وهتتسجني، وبنتك هتتشرد، وهتضطري تيجي تبوسي إيدي ورجلي علشان أتنازل. أنتي عندك بنت، هتربيها إزاي؟ اللي عملتيه ده ممكن يرميكي في السجن، علشان كده لازم يكون فيه وقفة ضد الناس اللي بتتاجر بالأكاذيب على حساب مشاعر الآخرين".

واختتم حديثه بالتأكيد على ضرورة التصدي لمروجي الشائعات، خاصة حينما تمس حياة الآخرين وكرامتهم ومشاعر ذويهم، مشددًا على أن الشهرة لا تعني الصمت أمام الإساءات أو التهاون في الحق.