شوبير لـ وزير الرياضة: دعم بيراميدز واجب لكن بـ "مشجعين بجد"

وجه الإعلامي أحمد شوبير، حارس مرمى الأهلي ومنتخب مصر السابق، رسالة إلى وزير الشباب والرياضة الدكتور أشرف صبحي، بخصوص مبادرته الأخيرة لدعم نادي بيراميدز في نهائي دوري أبطال إفريقيا أمام صن داونز الجنوب إفريقي.

كان وزير الرياضة قد أعلن عن مبادرة لحشد 10 آلاف متفرج لتشجيع فريق بيراميدز في مباراة العودة بالقاهرة. وتعليقًا على ذلك، قال شوبير في برنامجه الإذاعي: "بيراميدز هيلعب مع صن داونز وماتش العودة هنا وبإذن الله بتمنى من كل قلبي التوفيق لفريق بيراميدز في مباراة الذهاب يوم السبت المقبل".

وحول مبادرة الوزير، أوضح شوبير: "الوزير قال هنحشد ناس عشان يشجعوا بيراميدز، هيحشد إزاي هيكون من مراكز الشباب الموضوع مفيهوش مشكلة، والبعض غاضب جدًا وقال للوزير أنت ما تحشدش على حساب الدولة، لأ مش هيبقى على حساب الدولة هيبقى على حساب بيراميدز وده اللي بطلبه من الدكتور أشرف صبحي، هو هيقول لهم أنا هجيب لكم ناس بس، حضراتكم كنادي بيراميدز هتتكفلوا بالمصاريف والتذاكر والانتقالات والوجبات والحاجات دي كلها، فلا غبار على ما يفكر به الوزير وده دور دولة".

لكن شوبير شدد على نقطة جوهرية تتعلق بنوعية الجماهير التي سيتم حشدها: "هنا الأزمة السؤال هل الناس دي هتروح تشجع، ما هو أصل جماهير الكورة له طبيعة خاصة أنا عايز الناس تروح تشجع من قلبها أنا مش أحط ناس في المدرجات قاعدة مالهاش لازمة لكن قصة أقعد ناس في المدرجات فقط للمنظر، زي فيلم عادل إمام المنسي لما مع محمد هنيدي قال يا كابتن الفيلم ده قصة ولا مناظر إحنا مش عايزين الموضوع يبقى قصة ولا مناظر عايزين الموضوع يبقى مشجعين بجد ولو 5 آلاف بس".

واختتم شوبير دفاعه عن الوزير ورأيه في دعم الأندية: "الناس اللي عمالة تهاجم الوزير أنا شايف الوزير قام بدوره حاجة متزعلش يعني، يرجع يقولوا طيب ما بيعملش كده ليه مع الأهلي والزمالك، الأهلي مش محتاج والزمالك مش محتاج، فالمهم يعني المضمون مش الشكل والمهم إن بيراميدز يكسب ويفوز بالبطولة".
يُذكر أن مباراة الذهاب بين بيراميدز وصن داونز ستقام يوم السبت المقبل، على أن تكون مباراة العودة في القاهرة.