لميس الحديدي عن أزمة مشروع «بيت الوطن»: «لا بد من الثقة بين المواطن والحكومة»

أبدت الإعلامية لميس الحديدي، استيائها إزاء استمرار أزمة حاجزي أراضي المرحلة الثامنة بمشروع «بيت الوطن» للمصريين العاملين في الخارج، في منطقة مثلث الأمل (التجمع السادس حاليًا)، بعد الإعلان عن طرح وحدات سكنية ضمن مشروع تابع لشركة Hyde Park على نفس الموقع المخصص رسميًا للمغتربين منذ أغسطس 2022.

جذب المصريين في الخارج

وقالت خلال تقديمها حلقة جديدة من برنامجها "كلمة أخيرة" على شاشة ON: "لو كنا نريد أن نجذب المصريين في الخارج، ونقول إننا قمنا بمبادرة السيارات التي أخذت وقتًا طويلًا بين التعديل والنجاح، ونجحت؟ ولو كنا بنقول عايزين نزود تحويلات المصريين في الخارج، وهي بتزيد بشكل ممتاز وزادت بنسبة 70% عن الفترة المماثلة العام الماضي، فلو عايزين نجذبهم للاستثمار في مصر، لابد من الالتزام. العقد شريعة المتعاقدين".

وتابعت  قائلة:"لما بدأ مشروع بيت الوطن، الكل شارك في الاشادة  به، لأنه من المفترض أنه مخصص للعاملين في الخارج. إزاي الناس هتثق فيك؟ إزاي تاخد منهم مقدم حجز وتديهم موقع ولوكيشن ومخطط وهم مسافرين، وبعدين يفاجَأوا بتغيير مكان المخطط؟ حتى لو في أي مشكلة أو منفعة أو جه مستثمر كبير – رغم إن ده غير منطقي وغير قانوني – على الأقل لازم تستشير الحاجزين أولًا".
 

الثقة بين المواطن والحكومة
 

وواصلت:"هذه هي الثقة بين المواطن والحكومة، وعلشان كده ماتزعلوش لو المواطن راح يشتري من شركات تطوير عقاري تابعة للقطاع الخاص، والناس تقول الحكومة ممكن تغيّر رأيها".

وتساءلت:"هل إحنا عاوزين المصريين في الخارج يضخوا فلوسهم في استثمارات ولا تحويلات بس لأهاليهم؟ هذا هو السؤال اللي ترد عليه وزارة الإسكان. وإحنا حاولنا الاتصال بوزارة الإسكان ولم ترد".

واستغاث عدد من العاملين بالخارج حاجزي أراضي مثلث الأمل (التجمع السادس ) بمدينة القاهرة الجديدة بالدكتور مصطفى مدبولي رئيس مجلس الوزراء، والمهندس شريف الشربيني وزير الإسكان والمرافق والمجتمعات العمرانية لحل مشكلتهم وسرعة تسليمهم قطع الأراضي السابق تخصيصها لهم.