إعلان فعلاً لذيذ وكلماته حلوة .. محمود فايز يعلق على إعلان إتصالات الأخير
علق محمود فايز، المدرب العام لمنتخب مصر سابقاً على الإعلان الخاص بشركة إتصالات الذي أثار جدلًا واسعًا في الساعات الماضية، معبرًا عن إعجابه بالإعلان وكلماته.
وكتب فايز عبر حسابه الشخصي بموقع التواصل الإجتماعي فيسبوك: "حالاً لسه متفرج علي الإعلان الجدلي، واقسم بالله العظيم أول لحظه ما خدت بالي أصلاً من عربية الإسعاف صاحبة المشكلة".
وتابع: "موضوع الولد المجنون (أحمد كمال) هو يوتيوبر (بتاع أفلام) وأصلاً أهلاوي متعصب، شاب ظريف ودمه خفيف، هو نفسه بيغني، بيقول الأهلي حالة، فهمتها إنه مجنون بحب الأهلي زي ما أنا بشوف فيديوهاته في الحقيقة وردود أفعاله الانفعالية الظريفه مع ناديه، وبعد كده في آخر الإعلان، أحمد نفسه بيجري تاني وبيغني وبيقول (الأهلي حالة وأحب غيره ده استحالة) حاله من الجنون بحب ناديه، ده اللي فهمته والله من اول وهله".
واختتم: "بس الشركة نفسها ضربت كرسي في الكلوب بإزالة الإعلان من على كل المنصات، كده المريب أن يقول خذوني، رغم أن الإعلان فعلاً لذيذ وكلماته حلوة، بعيد عن اللقطه الجدلية، احترامنا مطلق لنادي الزمالك وجمهوره ومفيش فيه جدال ولا شك".
رد أحمد كمال
وكان أحمد كمال، الذي قام بدور "المجنون" في إعلان "الأهلي حالة"، رد على الرد على الانتقادات التي وُجّهت للإعلان.
وقال أحمد كمال في فيديو له عبر حسابه بموقع "إنستجرام": "عايز أقول لكم على حاجة مهمة جدًا بخصوص إعلان الأهلي، ناس كتير جدًا من إخواتنا الزملكاوية، طبعًا أنتم عارفين إن ده شرف كبير لي، يعني وأنا أول ما عرفت إن أنا هطلع في إعلان الأهلي، أنا وافقت بدون يعني أي حاجة".
وتابع: "حاجة مهمة جدًا بخصوص الناس كتير جدًا كاتبين في الإعلان إن أنا عامل مجنون الزمالك، وإن العربية من ورا فيها خطين بيض، يا جماعة، الإسعاف هو شكله كده طول عمره، والله العظيم تلاتة، يعني ربنا يشهد على كلامي، أنا جالي سيكونس باسم مجنون الأهلي، الموضوع والإعلان مالوش أي علاقة بالزمالك، ولبس المجانين ده هو لونه أبيض، والسيكونس والمخرج ما حدش جاب سيرة الزمالك خالص في الإعلان، محدش كان قصده حاجة".
توضيح للزملكاوية
وأضاف: "في نظريات طالعة من امبارح، وفي ناس كتير جدًا زملكاوية متضايقين مني، وبعتت لي: إنت إزاي تعمل فينا كده وبتاع؟.. وحتى أصحابي، والله العظيم تلاتة، والله كمان مرة، لا قصدنا ولا كان ده حاطينه في الحسبان، ولا أي حاجة. حبيت أوضح، دي حاجة مهمة جدًا علشان مش عايز حد يزعل مني".
واختتم قائلًا: "توضيح برضو، مكنش المقصود بالزمالك، هو الإعلان كله عبارة عن الأهلي، والأهلي بحاله،وأنتم عارفين طبعًا إن أنا عاشق للنادي الأهلي، وبعشق مانشستر يونايتد".
بلاغ من الزمالك
ويُذكر أن مجلس إدارة نادي الزمالك، تقدم ببلاغ إلى النائب العام ضد إحدى شركات الاتصالات، وأكد مصدر داخل نادي الزمالك أن التقدم بالشكوى سببه إعلان الشركة المسيء للنادي وجماهيره، والذي تم بثه مؤخرًا على شاشات التلفزيون، وعلى مواقع التواصل الاجتماعي.
موجة سخرية
وشهدت الساعات الماضية موجة سخرية شديدة من رواد مواقع التواصل الاجتماعي، بعد عرض الإعلان، الذي يراه جماهير الزمالك مسيئًا ويحمل السخرية.
