أحمد شوبير: مفاجآت جديدة في الدوري المصري.. وننتظر اجتماع اتحاد الكرة

أعلن الإعلامي أحمد شوبير حارس مرمى الأهلي ومنتخب مصر السابق عن مفاجآت جديدة قد تشهدها الساحة الرياضية، خاصة بعد صدور قرار رابطة الأندية أمس بإلغاء الهبوط لافتًا إلى أن عدم حضور بيراميدز والزمالك وحرس الحدود لن يؤثر على قرار الرابطة ولن يشكك فى فاعلية قرارها خاصة بعد اكتمال النصاب القانونى بحضور 15 نادى وتجديد الثقة فيها . 

وأوضح أحمد شوبير خلال برنامجه الإذاعي “مع شوبير” انه تحدث لأحد المسئولين الذى يثق جدًا بحديثه وأكد له أن الرابطة  غير منوطة بإعادة تشكيل وهيكلة شكل البولة ، كما ان تحديد شكل ونظام الدورى مسئولية كاملة للاتحاد المصري لكرة القدم دون دخل من الرابطة. 

وقال أحمد شوبير: “ تاخد مني اشتري مني زي ما قولت لك قبل شهرين إنه هيتم إلغاء الهبوط، أنا بحب الالتزام باللوائح وممكن اتنازل ع الالتزام باللائحة فى أضيق الحدود وفى ظروف اضطرارية ، انا هتكلم كلام يوجع ويضايق البعض بس أنا صريح ،  اتحاد الكرة من حقه يعمل اللي عايزه في الدرجات الأدنى تحت الدوري الممتاز، فعندك دوي المحترفين اللي من 20 نادي وناجح جدا، هيقول لك ليه معملش نفس النظام اللي حصل في الممتاز، في دوري المحترفين مش أنت كرابطة أرضيت أندية الدوري الممتاز ليه ما اعملش كده أنا كمان”.

وتابع شوبير: " اتحاد الكرة قد يدعو الأندية في دوري المحترفين فيقول لهم أيه اللي هيحصل يقولوا له إلغي الهبوط واعمل 3 مجموعات طب ازاي والدوري كله 20 نادي، لا ما احنا هنعمل أوكازيون الصعود وبدل ما كنا بنصعد 1 هنصعد 2 أو 3 أو 4 ونعمل 3 مجموعات كل مجموعة 16 فريق أو 18 أي حاجة ما هو فرح العمدة، وبعدين الدرجة الثانية والدرجة الثالثة وكده يعني".

وعرض أحمد شوبير اقتراح المهندس أيمن الشريعي رئيس نادي إنبي حيث قال :  “اقترح ان تتم مباراة حاسمة بين أخر  فريقين في الدوري، واللي يخسر يهبط” ن وعلق شوبير : " ده كلام كان محترم قوي وبالتالي تضمن الدوري الموسم المقبل 20 نادي وبالتالي الموسم المقبل هتهبط 3 مش 4".

واختتم شوبير: "أنا بقول لك من دلوقتي استحالة الموسم المقبل يهبد 4 أندية وأخشى أن يكون الموسم المقبل الدوري من مجموعيتن كل مجموعة 12 أو 14 أو 18 زي ما يكون بقه، تعاطفي مع الاسماعيلي واضح وتعاطفي مع المحلة واضح لكن النظام دائما هو الأفضل عشان يكون فيه نجاح ونظام".