تامر عبد المنعم عن أزمة نجل محمد رمضان: عيب نحاسب طفل لأننا بنكره أبوه

علق الفنان تامر عبد المنعم على قرار المحكمة بايداع نجل الفنان محمد رمضان دار رعاية بعد اعتدائه على طفل داخل نادي خاص في كومباوند شهير في أكتوبر.

وكتب تامر عبد المنعم عبر حسابه بموقع فيسبوك: “أنا كأب شايف أن عيب أوي وقاسية أوي أن خناقة عيلين خصوصا لو مافيهاش إصابات أو جروح توصل للمرحلة دي.. أياً كان اللي حصل ده طفل في النهاية ومهما وصل كرهك لأبوه عيب أوي ان الأمر يبقي فيه النيابات… أما عن الشامتين فحابب أقولهم شماتتكم بها رائحة حقد وغل لا يصح أبدا أنها تخرج من أسوياء تجاه طفل”.

منشور تامر عبد المنعم يثير جدلًا واسعًا بين مؤيد ومعارض

وتباينت الآراء حول منشور الفنان تامر عبد المنعم فالبعض اتفق معه وآخرين لم يوافقوه الرأي، فكتب أحد متابعيه: "اختلف معاك يا تامر لو محمد رمضان اعتذر و قال لابنه انه غلطان يبقي معك حق . لكن انه شايف انه فوق الناس ، و يجي يشجع ابنه اعتقد اهل الولد التاني مكنش عندهم اختيار"، 
 

وكتب آخر مستنكرًا منشور تامر عبد المنعم :"والطفل الي اتضرب و اتكسرت عينه ايه وضعه؟ وأب الطفل اللي اتضرب المفروض يعمل إيه غير أنه يلجاء للقضاء عشان يجيب حق ابنه ويعلمه أن حقك يجي بالقانون؟ يسكت .. لو بنت من بناتك حصل معاها نفس الموقف كنت حاتسكت؟ اشك".
 

وكتب متابع ثالث لم يوافقه الرأي أيضًا: “هو غير أمين على تربية ابنه لأنه هو اللى طلب من ابنه أنه يحبس الولد في الحمام لغاية ما يجى وهو اللي كتف الولد وقال لابنه يضربه بيعلمه البلطجة.. مكان البلطجية مش النوادي مكانهم الاصلاحيات يمكن يلحقوا يصلحوا اللي أبوه دمره”.

وفي المقابل أيده البعض كالآتي:" أتفق مع حضرتك جداا وكلامك ده علشان حضرتك راجل ابن اصول عينك مليانه ومن بيت أصله طيب وشيك وراقى علشان كده بتقول كلامك ده لكن للاسف مش كل الناس زى حضرتك وبناء عليه كلامك مش هيعجبهم"، وكتب ثاني: “مينفعش الي بيحصل دا الواد كدا هيطلع معقد معقوله فى ام تقبل ع طفل حتى لو ضرب ابنها انو يتحبس او يبقي ليه سجل اجرامى أو يتحط فى دار رعاية الواد دا أنا واثقة ان هتجيله عقدة من البلد”، 

وكتب متابع ثالث وافقه الرأي: “اكيد اللي وصل الدنيا لكده غروره هو لو كان اعتذر وعرف ابنه أنه أخطأ كان الموضوع اظن خلص وأكيد الولد زي أبوه أنا اختلف معاك معلش لازم نعلم أولادنا الاعتذار”، و"بيحصل بين العيال أكتر من كده وماسمعناش ان طفل اتحبس هو علشان ابن محمد رمضان يروحوا يشوفوا العشوائيات بيحصل ايه ده مش عدل".

تفاصيل الواقعة

وكانت محكمة الطفل بمدينة 6 أكتوبر قد قررت، أمس الخميس، إيداع نجل الفنان محمد رمضان، فى إحدى دور الرعاية، في القضية المعروفة إعلاميًا بالتعدي الجسدي على طفل داخل داخل نادٍ خاص.

بدأت الواقعة بتلقي قسم شرطة أول أكتوبر بلاغًا من سيدة تتهم فيه نجل الفنان محمد رمضان، بالاعتداء على طفلها البالغ 12 عامًا، وهو طالب في الصف السادس الابتدائي بإحدى المدارس الدولية، وذلك خلال وجودهما داخل نادٍ خاص بأحد الكمبوندات الشهيرة بمدينة أكتوبر.

سابقًا، نفت أسرة الطفل عمر محمد سالم، المعتدى عليه من ابن الفنان محمد رمضان، التصالح في البلاغ المقدم منه ضد نجل الفنان، مؤكدة أنه لم يحدث أي تواصل من جانب الفنان أو فريقه القانوني، وأن القضية لا تزال قيد التحقيق في النيابة.