حنان ترك تتحدث عن نشأتها وارتدائها الحجاب: تربيت في أسرة تتحدث عن العيب فقط

تحدثت الفنانة حنان ترك عن رحلتها الطويلة في البحث عن المعنى الحقيقي للسعادة والتي قادتها لاكتشاف ما وصفته بالثقافة الدينية، وكشفت سبب ارتدائها الحجاب، مشيرة إلى أنها نشأت في بيئة أسرية تربت فيها على مفهوم العيب أكثر من الحرام.

 قعدت أدور أنا ليه مش مبسوطة

وقالت حنان ترك في فيديو نشرته عبر حسابها بموقع انستجرام: كلنا بندور إننا نبقى مبسوطين .. نعرف ننام ونصحى وإحنا مبسوطين .. قعدت أدور أنا ليه مش مبسوطة .. وليه كل الفرحة والسعادة بتاعتي نسبية .. يعني إيه نسبية ؟ .. يعني إني أقدر مثلا آخذ الجايزة الفولانية .. وبعدها بـ 3 أو 4 ساعات ماحسش بحاجة .. اللي هو السعادة في الحياة نسبية جدًا ومفيش حاجة بتفضل معايا".

معنديش ثقافة دينية ومعنديش مجتمع حضني وفهمني 

وأضافت حنان ترك: "فقولت أكيد مش هي دي الدنيا.. يعني أنا ماجتش كده علشان أمشي كده .. ماجتش عبثًا علشان أمشي عبثًا .. بس أنا جاية هنا علشان حاجة معينة .. أنا معنديش ثقافة دينية .. معنديش مجتمع حضني وفهمني .. وأنا قعدت أدور على الحاجات دي بنفسي .. وقعدت أسمع كل أما حد يتكلم عن الله .. أجري وأشوف هو الله عايز إيه ؟

أنا متربية في حياة فيها العيب مش الحرام

وأشارت حنان ترك أنها تربت في بيت يصلي ويوم ولكن لا يجبر أحد على شيء ويتحدثون عن العيب وليس الحرام، قائلة: “أنا عارفة إن ربنا سبحانه وتعالى هو اللي خلق كل شئ، وأنا عابدة لله .. ومن بيت ماقدرش أقول متدين.. والدي ووالدتي بيصلوا ويصوموا .. بس ماكانوش بيجبروا حد على إنه يعمل حاجة .. أنا متربية في حياة فيها العيب مش الحرام .. يعني لأ ماتعمليش ده علشان عيب .. ماتلبسيش ده علشان عيب وعلشان الناس ولما يشوفوني هيقولوا إيه .. ولكن مش علشان لما ربنا سبحانه وتعالى يشوفني وأنا في الأمر ده هبقى مبسوطة ولا لأ"..

وتابعت: "الثقافة مختلفة تمامًا.. وإننا بنفكر جدا ده موضوع تاني .. إني أفكر إن ربنا سبحانه وتعالى شايفني في كل وقت وسامعني في كل حين .. ولما بسكت بيعرف إيه اللي جوايا .. دي ثقافة مهمة جدًا .. فيها ونس وتشجيع وأنه بيبعدك عن الحاجات الوحشة .. لأنك لما بتحبي حد مابتحبيش يشوفك في حاجة ماتصحش أو ماتنفعش أو مايحبهاش”.

إحنا بنعمل أقصى ما عندنا علشان نوصل للكمال

وأكملت: "إحنا بنعمل أقصى ما عندنا علشان نوصل للكمال .. قدام بشر زيه زينا .. فما بالك بالله سبحانه وتعالى .. فأنا كنت عمالة أدور على النقطة دي .. إن أنا ليه مش قادرة أبص في المرايا .. وأقول أنا كذا .. ليه مش قادرة وأنا بصلي أقول يارب أنا عايزة كذا .. حاسة أن فيه نواقص كتير عندي مش مساعداني إني أتكلم بأريحية أو بقلب جامد

ولفتت إلى انها كانت تتمنى أن لا يكون الحجاب فرض قائلة: “قعدت أدور كتير جدًا وعرفت أن الحجاب فرض .. أنا عارفة أنه فرض ولكن تأكدت .. واتصدمت لأني كنت رايحة وبقول يا رب الحجاب مايبقاش فرض .. لأني مش قادرة أعمله كبشر”.