ناقد رياضي يهاجم كولر: فرط في رابع ماتش على التوالي في فوز مهم

علق الناقد الرياضي خالد طلعت على أداء مارسيل كولر المدير الفني لنادي الاهلي في الفترة الأخيرة.

وكتب طلعت من خلال حسابه الشخصي فيسبوك: “مارسيل كولر بدأ بداية هايلة مع الأهلي، وأنا أشدت بيه كتير جدا، لكن الفترة الأخيرة وتشكيله وتبديلات وإدارته لمباريات القمة تحديدا عليه علامات استفهام كتيرة جدا”.

وتابع: “النهاردة الزمالك في أسوأ حالاته ونازل خايف وبيلعب جيم دفاعي بـ 3 مساكين، وكانت فرصة كبيرة للأهلي ولكولر يستغلوا سوء حالة الزمالك وخوفه ويكسبوا الماتش ده بسهولة وممكن باسكور كمان”.

أضاف: “لكن كولر عمل أخطاء كتيرة في التشكيل والتبديلات وبرضه واضح أن هو كمان كان خايف ومتحفظ بشكل كبير”.

تابع : “مركز الباك الشمال كريم الدبيس ماشي بشكل كويس جدا الفترة الاخيرة وبيلعب أداء هجومي ورغم كده ملعبوش ولعب كوكا اللي مستواه مش قد كده اخر فترة وبيلعب في غير مركزه الاصلي، وأداءه في المركز ده فيه تحفظ دفاعي كبير جدا ومالوش أي شكل هجومي وحتى اداءه الدفاعي كان سيء في جول الزمالك ومعملش رقابة على عمر جابر وسابه لوحده”.

أكمل: "مركز الباك اليمين محمد هاني هو الأساسي والأفضل والأكثر خبرة، وكمان بيكون ليه دور هجومي كويس، ورغم كده كولر لعب أكرم توفيق اللي متسواه برضه تراجع في الفترة الاخيرة بسبب أزمة الرحيل وعدم التجديد، وبرضه أداءه دفاعي بحت ومالوش مهام هجومية.

أكمل: “الأهلي فقد أهم أسلحته الهجومية وهما باكين الطرف ومكانش فيه أي ضغط على الزمالك، وكمان كولر اتأخر جدا في الدفع بوسام أبو علي رأس الحربة الأساسي والأهم في الأهلي خاصة وأنه رجع من الاصابة من فترة ولعب وقت اطول ماتش الاسماعيلي، ودفع بيه في الدقيقة 85 أخر 5 دقايق بس.

وأشار : “حتى تبديل بن شرقي في الدقيقة 60 كان ممكن يكون بدري أكتر مع بداية الشوط التاني خاصة في ظل الاداء المتواضع اللي ظهر بيه محمد عبد الله وظهر انه كان خايف وقلقان لافتقاده الخبرة”.

أكمل: “كمان لما كريم الدبيس نزل كان مفروض ينزل مكان كوكا ويسيب الشحات عشان يدي نزعة هجومية أكبر، مش ينزله مكان الشحات”.

اتم: “الإخفاق ده والتشكيل والتبديلات الغربية دي اصبح شىء معتاد من كولر في ماتشات القمة أخر 5 ماتشات اللي كلهم تقريبا فرط فيهم الاهلي في انتصارات سهلة وكبيرة”.

أضاف: “نهائي كأس مصر في الرياض كان الزمالك أفضل بكتير وأقرب للفوز والأهلي كسب 2-0 بجولين في آخر 5 دقايق منهم جول مشكوك فيه من تسلل”.

ماتش الدوري بعديه الزمالك كسب 2-1

تابع: “ماتش السوبر الإفريقي الأهلي بعد لما تقدم الزمالك تعادل وكسب ركلات ترجيح وكسب السوبر الإفريقي”.

أسرد: “ماتش السوبر المصري خلص تعادل وكان الزمالك اقرب للفوز في ركلات الترجيح لولا شيكابالا اللي سدد ركلة في غير مكانه وضيعها ورجع الاهلي للماتش والأهلي كسب”

واختتم :"وأخيرا ماتش النهاردة كان سهل جدا أن الاهلي يكسب لو بدأ بتشكيل صح ولكن كولر فرط كالعادة لرابع ماتش على التوالي في فوز مهم وسهل".