أبو المعاطي بعد هزيمة يد الزمالك .. هشام نصر بيعمل نفسه من بنها ومبيتكلمش

علق الناقد الرياضي أبو المعاطي زكي، علي  رد فعل رامي نصوحي، عضو مجلس إدارة نادي الزمالك، بعد هزيمة فريق اليد أمام الأهلي بنتيجة (31-27)، ضمن منافسات نصف نهائي كأس السوبر الإفريقي لكرة اليد.

وقل أبو المعاطي زكي في بث مباشر عبر حسابه الرسمي بموقع فيسبوك: " بيعجبني في رامي نصوحي أنه بيطلع يواجه ويتكلم، بينما هشام نصر نانب رئيس النادي، بيعمل نفسه من بنها، ومبيتكلمش في الموضوع، ولا أكن فيه حاجة حصلة عنده، ولا كان في موضوع اصلًا".

وتابع: "مبروك لرجال النادي الأهلي وتكمل علي خير النهارده، ونتمنى فوز النادي الأهلي والتأهل لكأس العالم للاندية ". 

محتاجين صبر وشغل كبير

وفي سياق متصل، علق رامي نصوحي، عضو مجلس إدارة نادي الزمالك، على هزيمة فريق اليد أمام الأهلي بنتيجة (31-27)، ضمن منافسات نصف نهائي كأس السوبر الإفريقي لكرة اليد.

غضب جماهيري

وكتب عبر حسابه بموقع "فيسبوك":" أنا عارف إن الناس زعلانة، وعندها كل الحق، مفيش حد بيحب يشوف فريقه بيخسر، لكن إحنا استلمنا ألعاب الصالات زيها زي باقي حاجات كتير في النادي، محتاجة شغل وبناء وصبر".

وتابع: "إحنا كنا عارفين ده كويس قبل الانتخابات، وعارفين إننا هنواجه كل اللي إحنا شايفينه دلوقتي، ومستحملين، وبنلتمس العذر للناس".

تصحيح الأوضاع

وأضاف: "يمكن ما نلحقش نحصد ثمار اللي بنعمله، لكن الأهم إننا نحط الزمالك على الطريق الصح، علشان اللي ييجي بعدنا ما يشوفش اللي إحنا شفناه، ولا يعيش اللي إحنا عشناه".
واختتم نصوحي قائلاً:" بشكر كل الناس اللي حضرت الماتش النهاردة، وحقكم عليا، ما تزعلوش".

تأهل الأهلي 

وحسم فريق كرة اليد بالنادي الأهلي، تأهله إلى المباراة النهائية لبطولة السوبر الإفريقي، بعدما حقق فوزًا مستحقًا على غريمه التقليدي الزمالك بنتيجة 31-27، في قمة مصرية خالصة جمعت بينهما مساء اليوم الإثنين، على صالة الأمير عبد الله الفيصل بالنادي الأهلي في القاهرة، ضمن منافسات نصف نهائي البطولة.

بهذا الفوز، يواصل الأهلي عروضه القوية في البطولات القارية، واقترب خطوة جديدة من منصة التتويج، حيث سيلعب المباراة النهائية غدًا، الثلاثاء، في ختام البطولة التي تُقام على مدار يومي 12 و13 من مايو، بمشاركة أربعة من أبرز الأندية الإفريقية.