ضياء الدين داوود يرد على الشائعات: قالولي عندك 7 فيلل إيجار قديم عشان يخوفوني
رد النائب ضياء الدين داوود، عضو مجلس النواب، بقوة على حملة الهجوم التي طالته مؤخرًا من بعض المؤيدين لتعديلات قانون الإيجار القديم، مؤكدًا أن ما يُثار حول امتلاكه عددًا من الفيلات والقصور لا أساس له من الصحة.
وقال ضياء الدين داوود في تصريحات خاصة لـ"نيوز رووم": "بيقولوا عندي 7 فيلل وقصرين؟!.. يا جماعة أنا مش عندي أي أملاك إيجار قديم، ومش بس كده، لكن في مستأجرين بيكملوا حياتهم فيها بكرامة، فكرًا وعملًا".
وأضاف النائب: "اللي بيهاجموني فاكرين إني هسكت عشان أخاف على صورتي.. لا يا سيدي، أنا بدافع عن ناس مالهاش صوت، وأنا مسؤول قدام ضميري وقدام ربنا، قبل ما أكون مسؤول قدام الناخبين".
وانتقد ضياء الدين داوود الصياغة الحالية لمشروعي القانونين، مؤكدًا أن بها "خللًا دستوريًا غير مسبوق"، مضيفًا: "نحن أمام سابقة أولى في تنازع أحكام المحكمة الدستورية، وهذا في حد ذاته يستحق الوقوف عنده لإعادة الدراسة والتأني في اتخاذ القرار".
وتابع: "أنا مش ضد التطوير، ولا مع بقاء أوضاع غير عادلة، لكن أنا مع دولة بتحترم تاريخ ناس عايشة في بيوت من 40 و50 سنة، مش معاها بدائل، ولا تقدر تتحمل صدمات مفاجئة. الإصلاح لازم يكون عادل، وتدريجي، وإنساني".
واختتم ضياء الدين داوود تصريحاته بالتأكيد على أن: "القوانين اللي بتُبني صح، بتبني دولة متماسكة.. إحنا مش في معركة بين ملاك ومستأجرين، إحنا بنبني وطن لازم يتسع للجميع".
