مالكة عقار بوسط البلد: "إيجار الشقق 5 جنيه ومش عايزين يدفعوا الصيانة"|خاص

روت "آمال" مالكة عقار في شارع خيرت بمنطقة وسط البلد، معاناتها مع المستأجرين لديها، مطالبة مجلس النواب بإقرار قانون الإيجار القديم سريعًا، وذلك قبل انطلاق اجتماع ملاك العقارات القديمة في البرلمان لمناقشة مشروع القانون.

إيجار شقق في وسط البلد بـ5 جنيهات

وقالت "آمال" في تصريحات خاصة لـ"نيوز رووم": "لديّ عقار مكون من 6 أدوار، 4 أدوار على 3 شقق ودورين على شقتين، وإيجار الشقق بأسعار تتراوح من 5 جنيهات، 6 جنيهات، 7 جنيهات، 50 جنيهًا و75 جنيهًا، وكانوا بيدفعوا في المحكمة ولما عرفوا إن القانون هيتغير قالوا كده كده هيمشوا وبقيت أخد الإيجار منهم".

وأضافت: "المستأجرين صحاب الشقق ماتوا اللي قاعدين دلوقتي الجيل الثالث أو الثاني، وهما عندهم شقق بره مأجرينها إيجار جديد وقاعدين عندنا، لو الناس ظروفها صعبة ليه متقدمش وتقول مش معانا فلوس والحكومة تساعدها، والضرائب اللي بتطلع من الضرائب العقارية تصرف عليهم يبقى حلينا مشكلة، كل الناس اللي كانت قافلة الشقق فتحوها عشان منعرفش ناخد الشقق منهم".

إقرار ذمة مالية لجميع المستأجرين

وتابعت "آمال": "منتظرة من المجلس يخاف علينا، لأن الأزهر والشيخ محمد متولي الشعراوي قال من 30 سنة إن قانون الإيجار قديم حرام، منتظرة الحق وإن يحكموا بالعدل ويرجعوا لنا حقوقنا، بيقولوا في ناس غلابة نشيلهم، بس في ناس معاها فلوس، يبقى نعمل إقرار ذمة مالية عشان نعرف اللي ظروفهم صعبة، ويقدم ذمة مالية والضرائب العقارية تدفعله والشقق الأخرى تتفتح والناس تروح على أملاكها".

وواصلت تصريحاتها قائلة: "في ناس كتيرة في إيجار قديم وظروفها كويسة جدًا، أنا مثلًا باخد معاش 1600 جنيه، وجارتي بتاخد هي وجوزها معاش 12 ألف جنيه يرضي مين بقى، ومين الغلبان، وتحدد إيجار ألف جنيه ليه؟، مش مكملين 50 جنيه إيجار في اليوم، وكل الماس عندهم تكيفات في الشقق وعربيات".

وتؤكد "آمال" أن المستأجرين لا يهتمون بالعمارة، وقال: "بوظوا المكان وغيروا اتجاه المواسير، عشان كده بنطالب البرلمان بفترة توفيق أوضاع 3 سنين بس، وإيجار 2000 جنيه حد أدنى مش ألف جنيه، لأنه وقتها هيفكر يروح يقعد في ملكه لأنه لسه عنده مصاريف، لكن يقول أروح شقتي وأدفع الـ2000 جنيه كهرباء".

مشكلة الصيانة

وأشارت إلى أن المستأجرين لا يدفعون أي مبالغ للصيانة في العمارة، وقالت: "الصيانة لازم تتحدد، مين هيشيلها، هما بيقولوا احنا مش تمليك عشان ندفع، بيدفعوا 5 جنيه ومش عايزين يدفعوا صيانة وكلهم ظروفهم حلوة وشغالين في أماكن كويسة جدًا، وأنا لحد دلوقتي مش قادرة أعمل عمرة بسبب ظروفي وعندي ملك، بيت ربنا مش قادرة أزوره".

واختتمت "آمال" تصريحاتها الخاصة قائلة: "منتظرة فترة 3 سنين توفيق أوضاع، والإيجار قيمته 3000 جنيه وأقل حاجة 2000، ويتحمل المستأجر قيمة الصيانة، ولو اتلف الصيانة يتم طرده لأنه مش خايف على العقار".