هيدي كرم تعلم جمهورها بأفكارها من خلال فيديو: "أنا تعبت"
أثارت الفنانة هيدي كرم الجدل بمقطع فيديو غريب عبر حسابها الرسمي على موقع تبادل الصور والفيديوهات إنستجرام، حيث ظهرت تتحدث فيه على مواقع التواصل الإجتماعي والمؤثرين، وعلقت هيدي كرم على الفيديو قائلة: “عيوبي عجباني”.
حيث بدأت الفنانة هيدي كرم حديثها قائلة: “أنا جاتي فكرة الصبح .. أنا تعبت أوي أوي من فكرة المثالية اللي على مواقع التواصل الإجتماعي .. تعبت من فكرة أن أحنا لازم نطلع من غير ولا غلطة .. وشنا عامل زي السيراميكا بلاطة مافيهوش ولا خدش ولا نقطة .. ولا حسنة ولا نمشة .. لازم نطلع مثاليين .. إيدينا صوابعنا .. دراعاتنا رجلينا بطننا وسطنا .. خلاص تعبت تعبت أوي .. مش قادرة .. نفسي نطلع طبيعين .. أحنا بني أدمين عندنا عيوب .. عندنا مشاكل .. عندنا نمش .. عندنا تجاعيد .. لازم نطلع طبيعين شوية .. اهدوا علينا .. نهدى على نفسنا".
هيدي كرم: “أحنا بشر وعندنا عيوب”
واستكملت هيدى كرم حديثها قائلة: “بجد نفسي نتقبل عيوبنا ونحبها .. نفتخر بيها ونتكلم عنها ونطلعها .. ونتصالح معاها .. أنا مش ضد عمليات التجميل .. حاجات تحسن من مظهري ومتغيرش في شكلي في نفس الوقت .. عشان شكلنا يبقى أجمل وأصغر .. بس أنا ضد أننا نصدر للشعب أننا مش بني أدمين .. كأننا مصنوعين من البنور ..أحنا مش ألمظية .. أحنا بشر .. لحم ودم وبنتعور وبنعلم .. عندنا نمش وعندنا بقع .. وبردو وجود الدريسينج رووم .. وكأن كله بقى عنده دريسينج رووم مافيش دواليب عادية .. اللي أحنا اتربينا عليها بالخزين اللي فوق ونطلع الصيفي وننزل الشتوي”.
هيدي كرم تضع حد للمثالية على مواقع السوشيال ميديا
واختتمت هيدي كرم حديثها: "مع كل هذه الإحباطات المتتالية من عظمة وجمال البنات على السوشيال ميديا .. لما تشوفهم على حقيقة متعرفهمش تحس أنها جاية بقفاها عليك .. تخليك تقول هو انا اتعميت على السوشيال ميديا ولا أنا نظري ضعف .. أحنا عملنا إحباط لبعض غير طبيعي .. وبقى عندنا يأس مش طبيعي .. وعدم رضا عن حياتنا مش طبيعي .. وناقمين على العيشة .. وبقينا حاسين دايمًا أن أحنا ناقصنا حاجة .. عشان أحنا مش زي هذا العالم الأفتراضي الغير حقيقي المفتعل على السوشيال ميديا.. فأنا تعبت.. ناس كتير أوي تعبت بس مش عارفة تعبر عن نفسها .. ومش عارفة إذا كان هي صح ولا غلط .. فأنا قررت من موقعي هذا أشجعكم واشجع نفسي واشجعهم هما كمان .. أننا نبدأ نرجع شوية شوية للطبيعي .. وللحقيقة ونبدأ نصدر لبعض طاقة إيجابية .. ونحسس بعض بأننا شبه بعض .. ومنتكسفش من عيوبنا .. ”.
