مالكة بيت في دار السلام تروي معاناتها مع المستأجرين وتُطالب بذمة مالية |خاص

قبل ساعات من اجتماع ملاك العقارات القديمة في البرلمان لمناقشة مشروع قانون الإيجار القديم، روت "ماجي" مالكة عقار في دار السلام، معاناتها مع المستأجرين لديها، مطالبة بسرعة إنجاز القانون وعودة الحقوق إلى أصحابها.

وأوضحت "ماجي" في تصريحات خاصة لـ"نيوز رووم"، أنها تجلس في بيت بمنطقة دار السلام مكون من 5 أدوار و10 شقق، وتجلس هي وأسرتها في شقتين بالدور الأخير، مشيرًا إلى أن البيت كان ملكًا لوالدة زوجها، قبل أن يشتروه من الورثة بالكامل، ولكن الإيجار الزهيد وسوء المعاملة، دفعاها للمطالبة بتطبيق القانون سريعًا لأن ظروف الحياة صعبة، خاصة أنها أرملة ولديها 5 أولاد.

ماجي تكشف قصص المستأجرين

وقالت: "البيت ده كان ملك حماتي وأشترينا من كل الورثة، وكسبوا من الشقق دي جامد اللي راح أكتوبر واللي راح المقطم واحنا لسه في البيت، ماعدا واحد بس أهله كانوا واخدين الشقة بـ50 جنيه مرضيش يبيعها شقة رقم 7 بيدفع 50 جنيه وبقاله 3 سنين مش بيدفع ولما طلبت يزود راح يحطهم في المحكمة، ومأجر الشقة رقم 8 اللي قدمها بألفين جنيه "

وتروي "ماجي" معاناتها مع بقية الشقق، وقالت: "في واحدة عندي في الدور الأول، قفلت الشقة 10 سنين مشيت من 2015، أول ما قالوا على القانون الفترة اللي فاتت جابت عفشها وجت، وهي عندها عمارة كبيرة في فيصل اللبيني، وأجرت شقتها بـ3000 جنيه، ورجعت هي قعدت في الشقة اللي بـ50 جنيه.. ده ظلم". 

وأضافت: "عندي واحد في الدور التاني، جارتي قصادي طلبت مني تركن عربية بينتها قدام البيت لحد ما يبلطوا الجراج اللي عند المجمع، استأذنت مني راح نزل وخبط على العربية وعمل مشكلة عشان تشيلها ونزلت قولتله إنها قالتلي يقولي بس أنا مش موافق.. هو ايه علاقته أصلًا؟.. بس هما بقول بيتعاملوا على أنه بيتهم".

وواصلت "ماجي" رواية قصص المستأجرين، وقالت: واحد أول ما والده تعب جه قعد معاه أستولى على الشقة أبوه مات وهو قعد، لما جه في الأول ابنه كان عنده 3 سنين دلوقتي بقى 17 سنة في الثانوية العامة من 2007 وهو هنا، وقعد وخلف ولد وبنت تاني، ايه أخرتها هنفضل كده وحقوقنا ضايعة يعني؟، هو قانون غلط جه في وقت غلط ولازم الأوضاع تتغير".

معاناة لصرف الإيجار من المحكمة

وتؤكد "ماجي" أنها تحتاج المصاريف لأن لديها 3 أولاد في الجامعة، بينهم بنت في كلية فنون جميلة، لذلك طلبت من المستأجرين بشكل ودي أن يتم زيادة الإيجار بدلًا من 50 جنيهًا، إلا أنها فوجئت أنهم اتفقوا واتحدوا، وقرروا وضع الإيجار في المحكمة، وأصبحت مضطرة للذهاب إلى المحكمة حتى تحصل على الإيجار.

وكشفت "ماجي" عن أزمتها في المحكمة، وقال: "الموظف في المحكمة عشان أخد الورقة اللي أصرف بيها، بيقولي اروح عند البنت اللي بتصور الورق هناك أجيبها بـ10 جنيه عشان أخد 50 جنيه، وبعدين قدر الرسوم بـ6 جنيه، ورجعتله تاني وبعدين أصور الورقة نسختين وأصور البطاقة، والنسخة الواحدة للتصوير في المحكمة بـ5 جنيه، أنا كده هاخد ايه من الـ50 جنيه، بأخد 6 شهور يعني 300 جنيه مش هيجيبوا كيلو لحمة حتى.. ده ظلم احنا عايزين تحرير علاقة أنا ميهمنيش الفلوس والزيادة يهمني يمشوا".

الاحتياج إلى شقة للابنة

وتؤكد مالكة العقار أنها في أشد الحاجة إلى الشقق، وقالت: "عندي بنتي ساكنة بره كانت عروسة في 2021 وأجرت بـ1700 جنيه، بعد سنتين زادت لـ2000 ودلوقتي عشان يجدد في شهر 7 عايز تبقى بـ3500، وبتكلمني تعيط عشان أجيبها عندي بس أنا هعمل ايه، وهي مش عارفة تعمل ايه هي بتشتغل وجوزها بيشتغل بس الإيجار هيكون غالي عليهم جدًا، وأنا بأجر بـ50 جنيه ومش باخدهم أصلًا وقاعدين كأنه بيتهم، وهما كلهم اللي عنده عمارة أو شقة في برج ليه الطمع بقى".

تحرير العلاقة الإيجارية

وتابعت "ماجي": "شوفت المستشار ميشيل حليم جايب كل تجار وسط البلد بيدافع عنهم، احنا ذنبنا ايه المفروض القانون خلاص يتغير اخر دولة كانت كده لبنان وعندها حرب والدنيا وحشة ورغم كده حرروا العلاقة الإيجارية، كنا مع رئيس لجنة حقوق الإنسان، عصام شيحة، وقالنا إن ألمانيا حررت العلاقة بعد 8 سنين أنا مستعدة لأي أمر بس نخلص، احنا لو كنا وافقنا نعمل القانون ده من 10 سنين كان مع انتهاء المجلس نهاية العلاقة".

المصالح سبب وقف القانون

وأشارت إلى أن النواب ورئيس المجلس كانوا وافقوا على القانون من قبل، وقبل الإمضاء أبدى مصطفى بكري، محمد أبو العنين والسجيني رفضهم التام، ليتم تأجيل القانون ودخل الدرج، وتُضيف: "هما دول هما هما مفيش غيرهم، عشان هما ليهم مصالح وشقق وبيوت، وبعدين احنا هنقعد لبتوع المصالح، بعض المستأجرين عندهم فيلا ومتمسكين بالشقة الإيجار القديم والورثة بيتخانقو".

وتابعت: "لو القانون اتعمل هيشيل أقنعة عن ناس كتير أنا واحدة عندي الشقة بتقولي هاتي 100 ألف جنيه، وأنا عيالي في الجامعات أجيب منين، قولتلها أنا عايزاها عشان بنتي تيجي تقعد معايا أنا ست كبيرة تبقى معايا وتساعدني، قالتلي هجيبلك ساكن يأجرها 59 سنة ويديلك الـ100 ألف وتاخدهم، وأنا أقعد معاه 60 سنة ازاي يعني عشان أخد إيجار 600 جنيه بدل 50 جنيه ده بعد سنتين كيلو اللحمة هيبقى بـ700 جنيه".

ذمة مالية للمستأجرين

وطالبت بعمل ذمة مالية للمستأجرين، وأضافت: "مش هنظلم حد لو عندي حد فقير مستعدة أشيله، لكن مش شايفة إن في حد فقير كلهم ظبطوا أوضاعهم وظبطوا نفسهم وعملوا فلوس وحوشوا فلوس من ورانا، مفيش حد قاعد فقير حتى لو في فقير رئيس الإسكان قال أنا هشيله، لكن الأغنياء بيستخبوا في الفقراء وكل ما نيجي نعمل قانون أنا مع القانون من زمان من أيام الراحل ماجد صلاح".

وأضافت: "كل ما نعمله يخرج البعض مثل الجعار وميشيل يقولوا هتودوا الناس فين هترموهم، خلاص الرئيس والحكومة عايزين يحلوا، لكن هما عايزين يشيلوها ليهم ولعيالهم مدى الحياة، هو احنا هنفضل كده طول عمرنا فعلًا، ده الساكن اللي في الدور التاني بيدور لابنه على عروسة بس بشرط تقعد معاهم في الشقة هو زوجته عشان يضمن أن الشقة الإيجار القديم لابنه ويورثها".

تحويشة العمر

وتكشف "ماجي" عن معاناتهم لشراء البيت، وقالت: "بعدين احنا كملاك موقفنا ايه، احنا اشترينا البيت بعد تعب جوزي قعد 6 سنين شغال في أبو ظبي وبنحوش الفلوس عشان نعرف نشتريه من 1982 حتى 1987، وقالي نشتري شقة في المعادي عشان كنت شغالة كاشير في مطعم كبير، وأنا قولت لا نشتري عمارة وأجرت عشان مصاريف العيال مكنتش أعرف إني هفضل كده مدى الحياة، الدنيا غليت اتقلبت خلاص كل القوانين بتتغير اشمعنى القانون ده اللي قاعده كده عشان القانون ده في ناس وراه مش عايزاه يمشي خالص".

وأبدت موافقتها على القانون المقدم من الحكومة بفترة توفيق أوضاع 5 سنين، وأضافت: "حتى لو 7 سنين موافقة عليه ولكن يحرروا العلاقة الأثيمة الغير طبيعية وبعدين كل الناس قالت إن دي قوانين استثنائية، المحكمة الدستورية بعتت إن دي قوانين لازم تتغير من 26 قانون مخالف ليه ساكتين عليهم بيقولوا عشان الغلابة ما في ناس على المعاش لكن عندها بيوت وأملاك، لما أقعد في شقة بـ50 جنيه وأجر شقتي بـ3000 جنيه أنا المستفادة".

واختتمت تصريحاتها قائلة: "ونيجي نشوف نلاقيهم مش عايزين يدفعوا في الصيانة بقالي أسبوعين بقولهم السلالم متكسرة وحجج وتأجيل بس واحنا كل ما العيال ينزلوا يقعوا مش عارفة أعمل معاهم ايه أي ترميم مش بيدفعوا بقالنا 30 سنة في البيت ده من سنة 1985 مش بيدفعوا حاجة من ورثنا الحكومة اديتهم، لكن احنا تعبنا وشقينا لحد ما جبناه مش وارثين واشتريت من الكل بفلوسنا".