قبل ما تشتري دهب 14.. تعرفي علي العيوب والمميزات والأسعار
مع ارتفاع أسعار الذهب عالميًا، أصبح دهب 14 خيارًا ذكيًا للكثير من النساء، خاصة الباحثات عن إطلالة أنيقة بسعر أقل، لكن قبل ما تشتري دهب 14، لازم تعرفي مميزاته وعيوبه، علشان تكوني واثقة من اختيارك، وهل يناسبك؟ إليك دليل شامل قبل الشراء يشمل الأسعار والنصائح المهمة.
إيه هو دهب 14؟
دهب 14 هو ذهب نقي بنسبة58.33%، والباقي عبارة عن معادن تانية زي النحاس والفضة والزنك، وده بيخليه أكثر صلابة ومتانة من الذهب الأعلى نقاء زي 18 أو 21 قيراط.
مميزات دهب 14:
سعره مناسب: أقل في التكلفة من دهب عيار 18 أو 21، فبيكون خيار ممتاز لو ميزانيتك محدودة.
مقاوم للخدوش: تركيبته المعدنية بتخليه أقوى، وده بيخليه مناسب للاستخدام اليومي.
ألوانه متعددة: ممكن تلاقي دهب 14 باللون الأصفر أو الأبيض أو الوردي، وده بيزود من جاذبيته في التصميمات الحديثة
مثالي للإكسسوارات الصغيرة: خصوصًا الخواتم أو السلاسل اللي بتلبسيها يوميًا ومش عايزة تتأثر بسرعة.
لكن ليه في ناس بتتردد؟ عيوب دهب 14:
أقل قيمة عند البيع: لأن نسبة الذهب النقي فيه أقل، فسعره وقت البيع بيكون أقل .
اللون مش لامع قوي: لمعانه أهدى من دهب 21، وده ممكن يفرق مع بعض الناس.
بيبهت مع الوقت: بسبب نسبة المعادن العالية فيه، ممكن يبهت أو يغير لونه أسرع من الأنواع الأعلى.
هل دهب 14 مناسب للعرائس؟
الحقيقة إن دهب 14 ممكن يكون اختيار عصري للعرائس بتحب التصميمات الجديدة أو عايزة قطع شيك بدون ميزانية ضخم، لكن لو بتدوري على استثمار طويل المدى أو عايزة تحتفظي بالمشغولات لسنين من غير ما تبهت، ممكن دهب 18 أو 21 يكون أفضل.
سعر دهب 14 في السوق المصري حاليًا
بيختلف السعر حسب شكل القطعة والمصنعية، لكن عمومًا يصل سعر جرام دهب 14 إلي 3144 جنيه مصري (حسب تحديثات السوق)، والمصنعية بتبدأ من 80 جنيه وقد توصل لـ 200 جنيه أو أكتر في القطع المصممة يدويًا.
نصائح قبل ما تشتري دهب 14:
اسألي عن نسبة الذهب النقي في القطعة.
اشتري من محل موثوق واطلبي فاتورة.
تأكدي إن القطعة مختومة بـ14K أو 585.
قارني الأسعار بين المحلات وشوفي لو في عروض أو تخفيضات.
دهب 14 خيار ذكي لو عايزة شكل راقٍ وسعر اقتصادي، لكن لازم تبقي عارفة عيوبه ومتوقعة أداءه على المدى الطويل، هو مناسب للاستخدام اليومي، وللي بتحب التجديد، وممكن يكون هدية جميلة أو قطعة أنيقة تضيفيها لمجموعتك.
