سرقة بـ3 ملايين جنيه في ثواني.. مغافلة صاحبة محل ذهب بالفيوم والاستيلاء على 5 سبائك في لمح البصر
واقعة سرقة مثيرة شهدها أحد محلات الذهب بمحافظة الفيوم، بعدما تعرضت صاحبة المحل لعملية مغافلة، استولى خلالها المتهم على 5 سبائك ذهب، وزن الواحدة 100 جرام، تقدر قيمتها بنحو 3 ملايين جنيه، بحسب رواية صاحبة المحل.
التفاصيل بدأت، وفقا للرواية المتداولة، لما المتهم دخل المحل بعد ما راقب المكان، وطلب شراء 5 سبائك ذهب. صاحبة المحل جهزت السبائك وحطتها في الأكياس المخصصة لها، مع الفواتير الرسمية، والمتهم وضعها داخل حقيبة بجانبه، بحجة إنه مستني وصول الفلوس.
وبعدها طلب تضييق خاتم لزوجته، فالعامل أخد الخاتم وخرج يوديه للورشة، لتبقى صاحبة المحل لوحدها. وهنا استغل المتهم الموقف، وطلب منها تشوف خاتم في الفاترينة، ولما اتحركت لجوه المحل، استولى على الحقيبة اللي فيها السبائك والفواتير، وهرب بسرعة.
صاحبة المحل، اللي عاشت حالة من الصدمة بعد اكتشاف الواقعة، نشرت فيديو بتحكي فيه التفاصيل، وكمان عرضت تفريغ كاميرات المراقبة، وأعلنت عن مكافأة مالية للي يقدر يساعد في الوصول للمتهم.
وقال ناشر الفيديو: «المتهم راقب المحل وعرف إن ما فيهوش غير صاحبة المحل وعامل. دخل وطلب 5 سبائك (وزن 100 جرام للواحدة، الست جهزت له السبائك وحطتها في الأكياس بتاعتها مع الفواتير الرسمية، وهو أخد كل ده وحطه في حقيبة جنبه بحجة إنه مستني وصول الفلوس».
أضاف: « طلب تضييق خاتم لزوجته، فالعامل أخده وخرج يوديه الورشة، وبقت الست لوحدها في المحل، بدأ يشاور لها على خاتم في الفاترينة، فطلعوا هما الاتنين يبصوا عليه، ولما دخلت لجوه على أساس إنه هيدخل وراها، استغل الثواني دي وأخد الشنطة اللي فيها السبائك والفواتير واختفى في لمح البصر!»
اختتم: «الست، من صدمتها والذهول اللي عاشته، عملت فيديو وحكت اللي حصل ونشرت تفريغ الكاميرات، ورصدت مكافأة مالية للي يوصل للمتهم».
