«كان بيجري على أكل عيشه».. حكاية شاب من بورسعيد فقد عينه في لحظة
في واقعة مؤلمة بمحافظة بورسعيد، بيواجه الشاب «أبو السعود»، البالغ من العمر 19 سنة، ظروف صحية صعبة بعد إصابته بطلقات خرطوش، خلال وجوده في مكان عمله بأحد المطاعم.
أبو السعود كان شغال في المطعم مع 5 من أصحابه، وبيحاولوا يوفروا لقمة عيشهم من شغلهم، لكن اللحظات العادية دي اتحولت لكابوس، بعدما دخل شخص، وبحوزته بندقية خرطوش وأطلق النار، ما تسبب في إصابة أبو السعود وزملائه.
فقدان كامل للعين الشمال.. وإصابات في أماكن متفرقة من جسمه
الإصابة الأخطر كانت في العين الشمال، اللي فقد أبو السعود البصر فيها بشكل كامل، كما أنه تعرض لإصابات بالخرطوش في وشه وسنانه ودراعه وصدره.
و خضع الشاب لـ3 عمليات جراحية، لكنه مازال يعاني من آثار الإصابات، وبيعتمد على المسكنات لتخفيف الألم.
من شاب بيجري على رزقه لمصاب مش قادر يرجع شغله
“أزمة أبو السعود مش بس في الإصابات اللي تعرض لها، لكن كمان في توقفه عن العمل، وهو لسه في بداية حياته، وكان كل اللي بيحاول يعمله إنه يكسب رزقه بالحلال”.
وثبت التقرير الطبي فقدانه الكامل للبصر في العين الشمال، وسط مناشدات لمساعدة الشاب في الحصول على الدعم اللازم لاستكمال علاجه، ومساندته في الظروف الصعبة اللي بيمر بيها.
