ياسمين رئيس في ندوة «الفستان الأبيض» : كنت خايفة من شكلي
قالت الفنانة ياسمين رئيس، خلال ندوة فيلم "الفستان الأبيض" إن فترة التوقف عن التصوير كانت مقلقة لها ولزميلتها أسماء جلال، خاصة بسبب الخوف من تغير الشكل الخارجي .
وأضافت : "كنت خايفة أنا وأسماء لما وقفنا فترة بسبب التصوير، كنت مرعوبة إن شكلي يتغير، وده حصللي قبل كده في فيلم وقت الكورونا، كان نص جسمي مليان والنص التاني رفيع".
تصريحات ياسمين رئيس
وأضافت ياسمين، أن الفيلم تصدّر التريند في مصر والدول العربية منذ أول أيام العيد، لافتة إلى أن تفاعل الجمهور عبر السوشيال ميديا جعلها تشعر بأن العمل وصل بالفعل إلى قلوب الناس. وقالت: "باب الحديد مثلًا سقط في السينما، لكن لسه عايش ومكمل، وأنا شايفة إن الفستان الأبيض هيعيش كمان".
وتطرقت رئيس، إلى كواليس الفيلم، مشيرة إلى أن زفافها الحقيقي كان في العيد، وهو ما شجعها على أن تكرّر هذه الحالة في الفيلم: "فكرت أعمل كده في فستاني عشان بنت تفرح، وجيلان عملت نفس الفكرة في فستانها، وكمان جوزت مجموعة بنات حلوين".
وعن المشاهد المؤثرة، كشفت ياسمين، أن أكثر مشهد لمسها كان بعد عودة الشخصية إلى البيت بعد الانفصال: "المشهد ده تم تصويره على أجزاء وكان صعب نفسيًا، وكمان مشهد المكتبة اللي جمعني بأسماء وإنجي كان تحدي، وفيه مشهد حضنت فيه أسماء، وكان ارتجال مني مش مكتوب".
وفي ختام حديثها، عبّرت ياسمين رئيس، عن رضاها الكامل عن الفيلم، لكنها ألمحت إلى صعوبة اختيار الأدوار الجيدة في الظروف الحالية: "نفسي أكمل بنفس مستوى الاختيارات، بس أوقات مفيش ورق كويس أو مخرج كويس. ورغم كده أنا راضية وشايفة إن البنات حبوا الفيلم واتفاعلوا معاه، فاكرة أول ندوة ليا كانت في دبي عن فتاة المصنع، قلت ساعتها: أنا مش هعيش، بس الفيلم هيعيش، وده اللي حاسة بيه دلوقتي برضو".
