صبري فواز يقترح حلولًا لأزمات الإنتاج : التوزيع هو أساس المشاكل
اقترح الفنان صبري فواز حلولًا لأزمات الإنتاج الفني في الفترة الأخيرة، بعد حديث العديد من المنتجين ونجوم الفن حول قلة فرص العمل وصعوبة الإنتاج.
وأكد صبري فواز في فيديو عبر حسابه الرسمي على إنستجرام، أن الحلول متاحة لأزمة الدراما، وليس لها علاقة بوجود نزاع بين المنتج والنجم أو طلبات فريق العمل أو المنتجين والشركة المتحدة، مشيرًا أن كل ذلك تشويشًا على المشكلة الأصلية للإنتاج في مصر.
وقال صبري في الفيديو : “فكرة إنك تقول إن الدولة بتاخد رسوم على الأعمال الفنية ده طبيعي في كل الدنيا، والمشكلة الأولى هي التصاريح إنك بتاخد تصريح من الداخلية وتدفع فلوس وبعدها يجيلك المسطحات وبعدها البلدية، وفجأة تتعطل وتدفع فلوس كتير جدًا والدنيا مابتمشيش”.
وواصل : "حق الدولة لازم يوصل يبقى نعمل الآتي فيه حلين، الأول إن الدولة تخش بـ 10% شريكة في هذا العمل، والحل التاني إن كل الحاجات دي تتحط في شباك واحد ويطلع بيهم تصريح واحد يسري مع جميع الجهات".
وأضاف صبري فواز : "المشكلة التانية إن المصنع بتاع الدراما ضخم جدًا، وفيه خامات مالهاش آخر وصنايعية شطار جدًا، وكل اللي بيعملوه إنهم بيستنوا لما يجي زبون واحد يبقى راجل سخي يختار اللي عايزه وياخد الطلبية، وبعدها نفضل قاعدين إيدينا على خدنا لحد ما يجي تاني".
وتابع : "ده كلام ماينفعش يعني لو الزبون ده عطل وعنده ظروف سنة هنعمل إيه وقتها ؟ هنعطل ؟، والحل وقتها إن جمهور الفن المصري موجود في كل حتة، وإحنا لمسنا ده لما شوفنا الاستقبال للرئيس في أقاصي الشرق للفن المصري، وده معناه إن الفن المصري حاضر وله زبون وده غير أمريكا الشمالية وأوروبا، وفاضل إننا نعمل بروتوكولات توزيع في مكاتبنا بكل السفارات".
وأكمل صبري فواز : "موضوع التوزيع هو الأساس في كل المشاكل، مش أجر الفنان، لأن بتوع الكورة بياخدوا أكتر من بتوع الفن خمسين مرة".
واختتم صبري : "المشاكل التانية هتتحل مع الوقت زي صورة الفنان والخناقات اللي بتحصل والهجوم على الفنانين بدون سبب، والأوحش إن بعض الفنانين بيأثروا كأنهم عاملين جريمة بسبب الابتزاز، والموضوع بسيط والفن المصري بخير".
