"معلومات متقولهاش في التلفون".. كيف يحاول المحتالون سرقة بياناتك البنكية ؟

في زمن التكنولوجيا والاحتيال الرقمي، الحفاظ على معلوماتك والأرقام السرية البنكية بقى مسؤولية شخصية.

وواحدة من أهم النصائح  التي يجب أن نلتزم بها: "ما تقولش أي معلومة بنكية عبر التليفون لأي حد مهما قال إنه من البنك"، لإن المكالمات التليفونية وسيلة شائعة للمحتالين من أجل الوصول لـ حسابك البنكي، والنتيجة ممكن تكون كارثية.

ومن أهم المعلومات هي الآتي:

الرقم السري OTP مش للمشاركة

الرمز السري المتغير أو ما يُعرف بـ "OTP" هو خط الدفاع الأول لـ حساباتك البنكية، البنك بيبعته ليك برسالة لما تحاول تدخل على حسابك أو تعمل عملية شراء، مشاركة الكود ده مع أي حد عبر التليفون معناها ببساطة إنك بتدي له مفتاح حسابك.

رقم البطاقة وتاريخ انتهائها

حتى لو حد كلمك علي التليفون وقالك "إحنا من البنك"، اسأل نفسك: ليه البنك هيطلب منك بياناتك البنكية كرقم بطاقتك أو تاريخ انتهائها؟ دي بيانات أساسية أي محتال محتاجها علشان يستخدم بطاقتك في الشراء أونلاين أو يسحب فلوس، خليك دايمًا حريص ومتجاوبش على الأسئلة دي في مكالمات.

رمز CVV سر 

رمز الأمان CVV موجود على ظهر بطاقتك هو رقم مهم جدًا في أي عملية شراء على الإنترنت، مجرد إنك تقوله لحد على التليفون ، حتى لو قال إنه من البنك أو شركة شحن أو جهة رسمية، بيخليه قادر يستخدم بطاقتك بدون ما تحس.

لا يوجد تحديث بيانات عبر الهاتف 

لو اتصل بيك شخص وقالك إنه هيحدّث بياناتك البنكية عن طريق مكالمة، اقفل التليفون فورًا، تحديث بياناتك البنكية بيتم فقط في فروع البنك وبشكل شخصي، المحتالين بيستخدموا الحيلة دي علشان ياخدوا منك كل المعلومات ويستولوا على حسابك.

حتى المكالمات اللي بتبدأ بشكل ودي أو فيها عروض مغرية ممكن تكون مصيدة، أي حديث بيبدأ فيه الطرف التاني يسألك عن بيانات بطاقتك أو البنك اللي بتتعامل معاه أو نوع الحساب، هو حديث مشبوه ولازم توقفه فورًا.

اتأكد من رقم المتصل قبل ما تتكلم

لو جالك اتصال وقالوا إنهم من البنك، اسألهم عن اسم الفرع واتصل أنت بنفسك بخدمة العملاء من الرقم الرسمي للبنك، ما تعتمدش على أي مكالمة جاية فجأة، خصوصًا لو طلبوا معلومات شخصية أو سرية.

جدير بالذكر أن فتاة كفيفة زعمت تعرضها للنصب والاحتيال على يد شخص ادعى أنه مسؤول خدمة عملاء بأحد البنوك وطلب منها بياناتها بزعم تحديث البيانات واستولي على أموالها الموجودة بحسابها البنكي.
ونشرت مريم كمال ضحية النصب على يد مسؤول بنك وهمي استغاثة عبر صفحتها الشخصية بموقع التواصل الاجتماعي فيسبوك أكدت خلاله تعرضها للنصب من أحد الأشخاص بعدما هاتفها وزعم أنه مسؤول خدمة العملاء بأحد البنوك الشهيرة وطلب منها بياناتها زاعما أنه سيحدث بياناتها: طلب مني البيانات بتاعتي وقالي إن الحساب بتاعك هيوقف ولازم نحدث البيانات.

وأضافت مريم: أنا قلتله أني كفيفة وهو كان مستعجل واخد بياناتي وسحب كل الفلوس اللي في الحساب  ودي مش فلوسي لوحدي دي فلوس البيت كله ومش عارفة أعمل أيه.

وأردفت مريم: مصدومة ومش عارفة أعمل أيه وإزاي هو قادر يعيش ويكمل حياته وهو ناصب على واحدة زيي واستغل اللي أنا فيه وحاسة أني هيحصلي حاجة.

واستغاثت مريم بالجهات المختصة لمساعدتها وعودة حقها من المسؤول المزيف الذي نصب عليها وسحب أموالها.