اضمحلال للأغنية الشعبية.. سمسم شهاب يفتح النار على مطربي المهرجانات
انتقد المطرب سمسم شهاب حال الأغنية الشعبية الحالي، مؤكدًا أن ما وصل إليه الفتن الشعبي يعتبر اضمحلالًا للهوية الشعبية، وذلك من خلال مقطع فيديو له عبر حسابه الرسمي على موقع التواصل الإجتماعي فيسبوك.
اضمحلال الهوية الشعبية
حيث علق سمسم شهاب قائلًا: “إحنا محتاجين الضبط، كفاية أوي الدور اللي بيقوم بيه مطربين المهرجانات مبوظين ودان الناس وسلوك الشباب وطريقة اللبس وكل حاجة، بس أنا اتكلمت في الموضوع ده وبنادي فيه من 2010 وقلت إن ده اضمحلال الأغنية الشعبية وهدم الهوية في الأغنية الشعبية، الجيل بتاعنا كنا بنعمل أغاني بتتكلم عن الرزق والأخ والأم المستوى الاجتماعي كنا بناقش قضايا، لكن الناس دي بتقدم إيه للناس؟ شيء صعب أوي، وكل ما بقعد مع أي حد بلقاه ناقم على الوضع طيب مين اللي راضي بيه؟، هل في شيزوفرينيا عند الناس؟، الجزء الثاني كان في ناس قالتلي إني مُقصر في حق جمهوري ونفسي، أنا بقدم شغلي وبعمل اللي عليا ومش ذنبي إن الناس مابتعملش سيرش، اللي بيحب شخص بيدعمه وبيدور عليه بس الناس بتستسهل، بيقولوا إنهم عندهم ملايين المشاهدات ولكن المحترمين في الشعب المصري وما أكثرهم، مابيسمعوش النوعية دي اللي بيقعد يقول أنا عم كذا وسيد كذا، دي أغاني معايرات وسببت بين الناس حالة من الغل بدل ما نصنع بين الناس الحب والاحترام، والمفروض نكمل مسيرة المُدرس ودورنا إننا نصدر صورة مجمع كويسة.”
“مش هبقى راضي عن نفسي”
واستكمل سمسم شهاب حديثه قائلًا: “أنا بـ إيدي أعمل النوعية دي وفي ثانية هبقى في حتة تالتة، ولكن مش هبقى راضي عن نفسي وهفقد احترام الناس اللي بتحبني، وأنا يعتبر تم استبعادي عمدًا من نص 2016، يعني من 10 سنين كاملين، ورغم ذلك لو بعد 100 سنة الواحد هيفضل سيرته كويسة، أنا عايز حد يقولي لو قدمت إسفاف أو قلت كلمة وحشة لحد، الفنان والرياضي لا يُقاس بعمره ولا بعدد مشاهدين، الفنان يقاس بما يحترمه ويقدمه للناس، أنت ممكن يشاهدك ملايين من البشر ولا نوعيتهم إيه؟ وثقافتهم إيه؟، وممكن يشاهدك عشرات الآلاف ولكن محترمين مش ولاد مش عارفين يتربوا، الزملاء الفنانين اللي معايا في نفس التصنيف كلهم إلا من رحم ربي واحد أو نص واحد مازال محتفظ، ولكن الباقي راحوا ولما تيجي تتكلم يقولك ده اللي ماشي، يا جماعة إحنا بقينا نسمع في الشارع حاجات صعبة أوي، لما تقعد في فرح وتلاقي أغنية إباحية شغالة ده ينفع؟، ولما نيجي نتكلم يطلع حد يقولك هو أنت بتبيع سبح؟، مقولتش إني ببيع سبح ولكن على الأقل مابمنعش اللي بيبيع سبح يبيع، على الأقل مابقدمش ليك شيء غير محترم، عايز تنتقدني انتقد بس بأدب.”
