"يارتني كنت شبهها في الحقيقة".. ريم هلال تكشف عن شخصيتها بمسلسل win win |خاص
انتهت الفنانة ريم هلال من تصوير كافة مشاهدها في مسلسل win win، مشوقة الجمهور لمفاجئات بالعمل، وقد كشفت عن الكواليس في تصريحات خاصة لـ موقع نيوز رووم.
وإليكم نص الحوار:
س: حدثينا عن ترشيحك لمسلسل win win وعن الكواليس؟
ج: الترشيج جاء عن طريق المخرج أحمد عفيفي اشتغلنا سوا زمان، وهو بيحب الشغل أوي وبيحب الممثل جدًا، كلمني من حوالي 4 شهور، واقنعني أني ارجع للتمثيل خاصة بعدما اطمئنيت على أولادي وأصغرهم دخلت المدرسة، وقالي عندي ورق حلو هبعتهولك وقولي رأيك ولو عجبك ارجعي، قريته ولاقيت الدور ظريف وحلو اوي، وفكرته جديدة خالص، وحبيت الفكرة فقولت أجرب وأعمل اختبار لنفسي بعد فترة الغياب دي.
س: ما هو دورك بـ مسلسل win win؟
ج: بجسد شخصية ياسمين هي بنت قوية واثقة في نفسها جدًا، بتعرف تاخد اللي هي عايزاه، طموحة وذكية، وياريت كنت أبقى زيها في الحقيقة.
س: ما رأيك في تجربة الميكرو دراما؟
ج: هو الأسكريبت كأنه فيلم، حتى كادرات التصوير، وأحمد أصلا مخرج أفلام كنت حاسة أني بصور فيلم، المميز فيها أنها سريعة، مافيهاش مط خالص، وبتتناسب مع الجيل الجديد وأن كل حاجة بسرعة.
س: هل من وجهة نظرك هذه التجربة سوف تسيطر على الدراما الفترة الجاية؟
ج: كل الناس بتتكلم عنها وبتقول هو ده الجديد وهو ده الجاي، والناس هي اللي عايزة كده، وتتعرض على المنصات هو ده اتجاه الجمهور، وأه ممكن يسيطر طبعا.
س: لماذا اختفت ريم هلال عن الأضواء خلال الفترة الماضية؟
ج: كنت معتزلة لفترة بسبب ظروفي الشخصية، لأني مبعرفش اعمل كذا حاجة في نفس الوقت، بحب اركز في حاجة واحدة واديها كل طاقتي، اختارت أقعد مع ولادي لحد ما يكبروا لحد ما اطمن عليهم.
س: ما رأيك في موضوع حق الأداء العلني بما أن معظم أعمالك السابقة بتتعرض بشكل واسع على التلفزيون؟
ج: كفكرة هايلة طبعا ولكن معنديش أي فكرة أزاي هتطبق أو تتنفذ في مصر بس ياريت طبعا أنا احب ده.
