كندة علوش: دخلت مجال التمثيل صدفة وكان حلمي الإخراج
كرم مهرجان أسوان الدولي لسينما المرأة الفنانة كندة علوش، وتحدثت كندة خلال ندوة عن بداية دخولها مجال التمثيل.
وقالت كندة: “دخلت التمثيل بالصدفة في سوريا.. ودرست مسرح عشان أكمل حلمي في مجال التمثيل .. وكان حلمي أصلا أشتغل في الإخراج وفعلا اشتغلت كمساعدة مخرج في السينما.. أخرجت 3 أفلام قصيرة بعدين رشا شربتجي قدمتني في مسلسل.. ونجح بشكل كبير، دي التجربة اللي خلتني أفكر في التمثيل، كنت في البداية بتعامل مع التمثيل بتلقائية وبالإحساس فقط، مكنتش بتعامل مع المهنة زي باقي الزملاء اللي كانوا بيقدروا يجسدوا أكثر من شخصية ”.
دخول كندة علوش مجال التمثيل في مصر
وعن دخول كندة علوش مجال التمثيل في مصر، قالت: “دخلت مجال التمثيل في مصر من خلال فيلم ولاد العم مع المخرج شريف عرفة.. أنا كنت خايفة من الخطوة .. لكنه شجعني كتير .. شريف عرفة جه سوريا عشان يختار ممثلين .. روحت أجرب وكان دور بنت فلسطينية .. في فيلم ولاد العم .. صورناه في جنوب أفريقيا .. ومن بعد الدور ناس كتير راهنت أني هعيش في مصر .. وبالفعل بقالي 15 سنة عايشة في مصر .. اتجوزت وخلفت ولادي في مصر".
كندة علوش تقارن بين التجربة المصرية والعالمية
وتحدثت كندة علوش عن وجهة نظرها في وجود اختلافات بين الصناعة المصرية والصناعة السورية، حيث قالت: “الفرق بينهم بيكون في تفاعل الجمهور على الموضوع اللي بتخص كل مجتمع .. في مخرجين بيقدموا أفلام مهرجانات.. ومخرجين بيقدموا أفلام شارع للجمهور العادي .. كل مخرج عنده رؤية مختلفة”.
وعن تجاربها العالمية، تحدثت كندة علوش: “ اللي بيميز الأفلام العالمية ان معظمها من إخراج سيدات .. بدءًا من فيلم السباحتان هو قصة حقيقية .. اللي شدني فكرة الفيلم لأنه بيتكلم عن قضية حقيقية وهي سوريا واللاجئيين وبيعرض تجربة إنسانية .. والفيلم التاني كان فيلم النزوح وعن قضية نزوح السوريين والآثار المترتبة على الحرب .. واتكرمت بسببه في مهرجان فينسيا .. وفيلم وودي باص كان تجربة جديدة بالتعاون مع فنانين من الهند .. ومن إخراج مخرجة أمريكية .. طريقة التعامل معاهم كأني باخد ورشة”.
