أحمد طه نجم فيلم نور عيني: حادثة قعدتني 5 سنين على السرير والناس بعدت عني |خاص
في أول ظهور إعلامي له بعد غياب طويل، كشف الفنان أحمد طه عن السبب وراء ابتعاده عن الساحة الفنية، وذلك بعد عودته للتمثيل مجددًا من خلال مسلسل أنا أنت.. أنت مش أنا، والذي سيشهد عودته بعد غياب 8 سنوات.
أحمد طه يكشف سبب اختفائه
وقال أحمد طه خلال لقائه في نيوز رووم: “بعدت بسبب ظروف صحية، عملت حادثة وقعدت ست سنين بعيد، منهم 5 سنين في السرير، وعملت 11 عملية في رجلي.. والحمد لله حاليًا بصحة جيدة وربنا كرمني جدًا”.
أحمد طه يتحدث عن عودته بمسلسل جديد
وتحدث أحمد طه عن عودته من خلال مسلسل أنا أنت.. أنت مش أنا، قائلًا: المسلسل له حالة خاصة معايا لأسباب كتير، أهمها المنتج إيهاب منير.. إحنا صحاب وأخوات من أكتر من 25 سنة، وهو من أهم الناس اللي في حياتي وكان دايمًا بيدعمني ويقولي هترجع وتبقى كويس، ولما شافني برجع أمشي قال لي: تعالى اشتغل في المسلسل.. وده بالنسبة لي حاجة كبيرة جدًا حتى وأنا دوري صغير لكني مبسوط أني راجع بدعم إيهاب منير وده لا يقدر بتمن، وفخور إني مشارك في مسلسل كبير مع مخرج شاطر والفنان معتصم النهار فنان جميل، ورجوعي بالنسبة لي مرضي نفسيا ومهنيا".
أحمد طه يكشف تفاصيل مرضه
وعن تفاصيل فترة مرضه قال أحمد طه: “كانت فترة صعبة جدًا.. عملت الحادثة 2019 وفي بداية 2021 كنت بتحرك بعكازين وعلى رجل واحدة، وفي مرة الناس القريبة مني خدوني أغير جو لأني قعدت سنين في السرير لكن لاحظت الناس بتبصلي بصات غريبة وحسيتهم بياخدوا جنب مني وبيبعدوا، فلما روحت بيتي قلت عادي مش مهم، المهم أن ربنا معايا وأمي معايا واللي يضايق يضايق واللي عاوز يعمل حاجة يعملها وأنا مركز وبقاوم وبعافر والحمد لله”.
وعن الأشخاص الذين دعموه في فترة مرضه قال: “تامر حسني عمل كتير جدًا، محمد السبكي، أسامة الخبيري، إسماعيل فاروق وأحمد بجة، وعمري ما هنسى دعمهم المعنوي ليا”.
وعن تعاونه السابق مع تامر حسني في فيلم نور عيني قال: “الناس فاكرة دوري في الفيلم لأنه كان مع تامر حسني، وطبيعي أي حد هيشتغل معاه هينجح لأن نجمه غير عادي وجمهوره كبير”.
وأضاف: “أتمنى اشتغل معاه تاني لو عنده دور مناسب ليا لأنه من أنجح الفنانين في الوطن العربي”.
وأوضح أحمد طه أنه ابتعد عن السوشيال ميديا خلال فترة مرضه بسبب بعض التعليقات التي كانت تزعجه من متابعيه ومن بعض زملائه بالوسط الفني.
واختتم أحمد طه حديثه قائلًا “اللي خرجت به من التجربة دي أن ربنا كبير جدًا، ودايمً لازم نقول الحمد لله مهما كانت الظروف صعبة.. عافر، وأوعى تستلم، ولازم ترضى، لأن ربنا بيعمل كل حاجة لصالحك، وأنا عمري ما تخيلت أني أقوم على رجلي تاني وكنت بعيط وأقوله يا رب مش عاوز شغل ولا فلوس ولا صحاب عاوز أمشي”.
