عمرو الجزار بعد إصابته : راضي بقضاء ربنا وإن شاء الله أرجع أقوى من الأول
حرص عمرو الجزار، لاعب الفريق الأول لكرة القدم بالنادي الأهلي، على توجيه رسالة إلى جماهيره بعد إصابته بقطع في الرباط الصليبي الأمامي والغضروف الداخلي، مؤكدًا رضاه بقضاء الله واستعداده لبدء رحلة العلاج والتأهيل.
وكتب الجزار عبر حسابه على مواقع التواصل الاجتماعي: الحمد لله على كل حال، وفي كل وقت. يمكن الإصابة دي تكون من أصعب الاختبارات اللي مريت بيها، لكني مؤمن إن كل حاجة بتحصل بقدر ربنا ولحكمة يمكن لسه مش شايفها.
وأضاف: أنا راضي بقضاء ربنا، وصابر، وشاكر على كل نعمة في حياتي، وشاكر أكثر على كل الحب والدعاء اللي شوفته منكم في الوقت ده. رسائلكم، دعواتكم، وكلامكم كان ليهم أثر كبير عندي، ومش هنساه.
وتابع لاعب الأهلي: أنا مؤمن إن ربنا مش بيأخذ حاجة إلا وبيعوض، وإن بعد كل صبر فرج، وبعد كل صعوبة قوة جديدة.
وأتم: هبدأ رحلة العلاج والتأهيل بكل إيمان وصبر، وإن شاء الله أرجع أقوى من الأول. دعواتكم ليا.. الحمد لله دائمًا وأبدًا.
