«أغلى قسط ممكن تدفعه هو يوم من عمرك».. عمرو الليثي يحذر من دوامة التقسيط
حذر الإعلامي الدكتور عمرو الليثي من الانشغال المستمر بالأقساط والالتزامات المالية على حساب الاستمتاع بالحياة وعيش اللحظات مع الأسرة والأصدقاء، مؤكدا أن الإنسان قد يدفع ثمن بعض أحلامه من عمره وليس من أمواله فقط.
الجمعيات والسلف والقروض
وقال الليثي خلال حلقة من برنامجه «إنسان تاني»، التي نشر مقتطفات منها عبر حساباته الرسمية على مواقع التواصل الاجتماعي: «في ناس مننا حاطة تحويشة عمرها في شقة بالقسط وقبلها عربية بالقسط، ده غير الجمعيات والسلف والقروض بدون فوائد. معظمنا عايش نفس الظروف، بس الملفت إن السداد مش فلوس بس بندفع من عمرنا، بندفع تمن الشغف والحلم والأمل في مستقبل أفضل».
قصة «عم أمين»
وسرد عمرو الليثي قصة «عم أمين»، صاحب محل بقالة، والذي عاش سنوات طويلة في الكفاح من أجل تربية أبنائه الأربعة وتجهيزهم للزواج.
وقال الليثي على لسان «عم أمين»: «عم أمين بيحكيلي إنه عاش عمره كله في الكفاح. من محل البقالة ده جوز عياله الأربعة.،اتفق مع ابنه إنه هيساعده في المقدمة بس، بس الظروف ما سمحتش، فكملت أنا كأي أب أسدد الباقي بالقسط، وعشت باقي عمري بسدد».
وأضاف: «الحمد لله جوزت عيالي الأربعة وأديت رسالتي، بس اللي محزني إن عمري ضاع في الأقساط، ومفوقتش إلا وأنا عندي 80 سنة. ما لحقتش أفرح ولا أشوف الدنيا».
وتابع الليثي: «وفجأة لقيت نفسي كبرت ومراتي كبرت وعيالي اتجوزوا، ومحدش بيسأل غير كل فين وفين، وأنا قاعد قدام كشك البقالة».
ووجّه «عم أمين» رسالة للشباب قائلا: «افرح بشبابك يا ابني وبدنيتك، وإياك تعمل زي عمك أمين وتضيع عمرك بالتقسيط».
عمرو الليثي: «إحنا في دوامة التقسيط بننسى نعيش»
وعلق عمرو الليثي على القصة، مؤكدًا أن الانشغال بسداد الالتزامات قد يجعل الإنسان يؤجل الكثير من لحظات السعادة التي لا يمكن استعادتها.
وقال: «اتعلمت درس من عم أمين، إحنا في دوامة التقسيط بننسى نعيش العمر بيروح واللحظات الحلوة بتعدي مرور الكرام. بنرفض خروجة مع أصحابنا وبنأجل فرحة وبنكتم ضحكة عشان مشغولين بسداد الأقساط».
وأضاف: «اللي بيشتري حاجة بالقسط مش بيسددها فلوس بس، ده بيسددها من عمره وحياته. لازم ندرك بنعمل إيه وهل يستاهل نضيع عمرنا عشانه».
واختتم الليثي رسالته قائلا: «عيش عمرك وحقق واشتري، بس ما تنساش تحسب إن العمر من ضمن التكلفة. وما تخليش الحياة تسرقك لأن أغلى قسط ممكن تدفعه هو يوم من عمرك».
ويأتي برنامج «إنسان تاني» في إطار اهتمام عمرو الليثي بتقديم محتوى إنساني واجتماعي، من خلال عرض قصص وتجارب إنسانية ونماذج من المجتمع واجهت تحديات مختلفة وقررت بدء حياة جديدة.
