بعد نجاحها في بنج كلي.. ناندا محمد تكشف كواليس شخصية مس نادية |حوار
تصدرت الفنانة ناندا محمد تريند محركات البحث جوجل، وذلك بسبب تألقها في تجسيد شخصية مس نادية الممرضة ضمن أحداث مسلسل بنج كلي، وقد كشفت ناندا محمد عن كواليس تجسيدها للشخصية من خلال حوار مع موقع نيوز رووم.
وإليكم نص الحوار:
س: حدثينا عن الكواليس خاصة أن كل المشاهد بداخل مستشفى؟
ج: الكواليس كانت جميلة ولطيفة جدًا، الشغل مع أستاذة نادين جميل فعلا فنيًا وإنسانيًا، بتهتم بالتفاصيل وبتهتم بكل حد شغال في المسلسل شخص محترم جدًا، أنا انبسطت جدًا بالشغل مع الكرو كله الشغل كان ممتع جدًا، هما فنانين وأشخاص محترمين جدًا، أنا محستش خالص بالملل وكنت مستمتعة جدًا، حاجة تشرف جدًا الشغل معاهم بالطريقة دي.
س: كيف جاء ترشيحك للمسلسل وما الذي جذبك؟
ج: الكاستينج دايركتور مودي شاهين كلمني وقالي أنه رشحني للدور، أستاذ مودي شخص محترف وبيحب شغله واختياراته فظيعة ولكن كمان هو دايمًا بيشتغل بشكل غير متوقع، وأنا كنت سعيدة جدًا بالدور ده، وأنا كنت مستنية أطلع بدور زي نادية غير الجانب بتاعي في شخصيتي بمسلسل بطلوع الروح، وكنت متحمسة جدًا للشغل مع الكرو.
س: بعد شخصية مس نادية وعلاقتها بقريبها.. ناندا بتمشي ورا قلبها ولا عقلها في الحب؟
ج: أنا في الغالب بمشي ورا قلبي، بحس أن قلبي دليلي وبحس أن الواحد لازم يوثق بحدسه، بس طبعا بحكم عقلي في حاجات كتير، بس الحب تحديدًا أو الجواز بيبقى لازم الاتنين، أنا لما اتجوزت عازف الكمان والمؤلف الموسيقي المصري محمد سامي كانوا الاتنين ماشيين مع بعض، عقلي كان بيديني إشارات أن هو ده الشخص المناسب اللي أكمل معاه حياتي.
س: رأيك ك ناندا فعلا في تفرقة بتحصل بين لرجال والسيدات في وظائف معينة مثل التمريض والطب وغيرهم؟
ج: أه بصراحة بيحصل تفرقة في العالم كله مش بس عندنا ومش بس في الوظايف ده في كل حاجة، في إحصائيات أتعملت وشافوا أن معظم الوظائف اللي فيها رجالة وستات الرجالة بياخدوا النسبة الأكبر وده في كل المهن مش دايمًا بس في حالات كتير من التقدير المادي للتقدير المعنوي، وأعتقد أحنا دايمًا محتاجين نسلط الضوء على الموضوع ده، والستات يشتغلوا أكتر على ده وميقبلوش ويتكلموا.
س: ما رأيك في ردود الفعل؟ وما هو اكتر رد فعل اثر فيكي؟ وهل كنت متوقعة هذا؟
ج: ردود الفعل مش عارفة أعبر عنها، محبة الناس غمرتني من بداية عرض المسلسل، كم كبير من الجمهور بيبعتلي رسايل على السوشيال ميديا، أنا للأسف من بداية عرض المسلسل مكنتش في مصر كنت في عروض في فرنسا وهرجع يوم 28، فمتشوقة جدًا أشوف رد الفعل على الأرض ايه، ردود الفعل فاقت توقعاتي بكتير، مكنتش متوقعة ده، وحقيقي ممتنة لكل كلمة حد بعتهالي وممتنة للناس اللي بتقولي أنهم مش مصدقين أني سورية ودي حاجة تشرفني أنكم تشوفوني مصرية، شكرًا على الحب ده كله.
س: لو رجع بيكي الزمن بعد بنج كلي ممكن تفكري أن تتجهي لدراسة الطب والعمل به؟
ج: معتقدتش خالص، أنا عندي فوبيا المستشفيات ومش مكان مريح بالنسبالي وثانيًا مهنة الطب محتاجة حد بيحبها جدًا وشايف نفسه فيها عشان يقدر يشتغلها ويدي فيها، هي من أهم المهن وهما أكتر ناس بتتعب والشغل فعلا متعب نفسيًا وجسديًا، بس أنا عمري ما فكرت أشتغل في الطب، والأهم أني طول طفولتي أنا بحلم أني أكون ممثلة، وده المكان اللي شايفة نفسي فيه.
س: انت في الأساس سورية.. ما الذي حمسك للمشاركة في الأعمال المصرية.. وهل شايفة أن مصر فعلا بوابة الشرق الاوسط في السينما والدراما؟
ج: أي ممثل في الشرق الأوسط يحب يشتغل في مصر، مصر هي مركز الدراما والفن في الوطن العربي كله، وأنا عايشة في مصر بقالي متير، وبشتغل مسرح طول الوقت مع فرقة المعبد وعملنا مسرحيات كتير في مصر وبرا مصر، وكل العروض من إخراج أحمد العطار، فخلاص أنا بقيت مصرية، كنت مُقلة شوية في الدراما لأسباب خاصة ولكن الفترة الجاية هرجع أهتم تاني بالدراما، وهفضل أشتغل مسرح، صناعة الدراما في مصر قوية جدًا وده معروف من سنين طويلة، الجمهور المصري أنه يحبني ده حاجة عظيمة.
س: ما هي الأشياء التي تطورت في ناندا من دورها في بطلوع الروح لدورها في بنج كلي؟
ج: بطلوع الروح كان عامل صدى كبير، واتمنى أن الناس هي اللي تجاوب شايفة أيه اتغير فيا، وشوفت كومنتات كتير الناس مش متوقعة أن مس نادية هي أم ليث في بطلوع الروح، مبسوطة جدًا أني قدرت أعمل شخصية مختلفة تمامًا عن ناندا وعن أم ليث وعن ادوار كتير تانية، الدور ده كان فرصة الجمهور يشوفني بطريقة مختلفة.
