رسالة ليلى أحمد زاهر الرومانسية لزوجها هشام جمال بعد جدل حلقة أنس بوخش
حرصت الفنانة ليلى زاهر على توجيه رسالة رومانسية لزوجها هشام جمال ، وذلك بعد الجدل الذي حدث عقب ظهورهما مع الإعلامي أنس بوخش في برنامج ABTALKS .
وكتبت ليلى زاهر عبر حسابها الشخصي على موقع التواصل الاجتماعي انستجرام : بحبك .
ولاقت الكلمة تفاعل وإعجاب كبير من الجمهور ، الذي اعتبرها رسالة رومانسية وصريحة لحسم الجدل وسوء الفهم الذي حدث بعد الحلقة مع أنس بوخش .
وكانت أوضحت الفنانة ليلى زاهر حقيقة تصريحاتها التي أثارت تفاعلًا واسعًا عقب ظهورها في برنامج AB Talks مع أنس بوخش ، مؤكدة أن هناك أجزاء تم حذفها من الحلقة ، أدت إلى سوء الفهم الذي حدث على السوشيال ميديا ، كما طالبت الجميع بالدعاء لها ولزوجها بالسعادة في حياتهم .
ليلى زاهر ترد على انتقادات حلقتها مع أنس بوخش
وكتبت ليلى زاهر عبر صفحته الشخصية على موقع التواصل الاجتماعي انستجرام : بحترم وبقدر ردود الأفعال واهتمامكم بس حابة أوضح كام نقطة لأن في أجزاء من الحلقة اتقطعت واتاخدت بمعاني غلط ، تصوير حلقة AB Talks حصل وأنا في أواخر شهور الحمل قبل التصوير إدارة أعمالنا بلغت فريق البرنامج إننا هنوصل متأخر لأني تعبت شوية، ولما وصلنا اعتذرنا لأنس وفريق البرنامج بالكامل على التأخير ، واحنا داخلين الاستوديو قلت لهشام إني لسه تعبانة وطلبت منه يساعد أكثر في إدارة الحوار لأني كنت تعبانة ولأن طاقتي بشكل عام أقل الفتره دي وده شيء طبيعي.
وأضافت : موقف السفر حصل فعلا ! لكن بعدها لوحده اتكلم معايا وقالي إنه انتبه إنه تصرف غلط بحكم طريقة نشأة شباب كتير وانه نوع تصرفات محتاج تصحيح وعلاج وده كان تكملة كلامه الموجود في الحلقه الكاملة ، والحقيقة ان من يومها محصلش موقف مشابه، وفكرة إن راجل ياخد باله ويحلل ويصارح بالمشكلة ويتغير عشانك هو أكيد شيء يحترم ، أنا اخترتك ! وأنا كمان اخترته لأن كثير من أسبابنا متشابهة وأكيد بحبه عشان طريقة تعامله معايا وكمان تعاملاته في حياته ومع الناس، وأكيد عشان شايفاه الأحسن والأنسب والأحلى في كل حاجة ، وسبب ذكر الجملة دي في الحلقه هو نقاش عن الغيرة، وانه كان بيأكدلي هو ليه عمره ما يشوف واحدة أحسن مني مش لأنه بيشرح بطريقة متعالية زي ما الجزء اللي نزل كان بيتكتب عليه.
وتابعت : علاقتي بـ هشام بدأت من ٤ سنين، وبقالنا حوالي سنة ونص متجوزين وأنا أكثر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا احنا الاتنين، لكن كمان أنا عندي أمي وجدتين وإخوات وصديقات قريبين مني جدا ، كلهم سيدات بخبرات مختلفة شايفين علاقتنا من قريب وعايشين تفاصيل كثير منها ، وكلهم بيحترموه وبيحبوه وبيدعولنا نكمل بنفس التفاهم اللي إحنا فيه ، أنا بتكلم عن شخص من يوم فرحنا لحد النهارده كل أيامي معاه حلوه بيعاملني بكل حب واحترام وتقدير ، شخص من أول يوم في حملي مسابنيش في تعب، ولا سفر لشغلي، ولا زيارة دكتور، لأنه حاططني أولوية في حياته وقدر يحتويني بتغيرات مشاعري وأحاسيسي خلال تجربة جديدة علينا احنا الاثنين.
واستكملت : أنا أقدر أحكم على اللي أنا عايشاه حاليا وهو إننا عدينا أول مرحلة من الجواز بيتقال عليها من أصعب المراحل، بحب وتفاهم وأتمنى نكمل كده وأحسن ان شاء الله بعيدا عن التنبؤات المتشائمة المتأثره بانتشار العلاقات السامة واللي هيلاقوا دايما زاويه تقلب او تحور اي شيء إيجابي لـ سلبي حتى الكلام اللي أنا بكتبه دلوقتي.
واختتمت : ربنا يكتب لكل حد السعادة والراحة في حياته بطريقته وإن شاء الله تشوفونا بعد سنين أكثر، وتكون مبسوطين ومتفاهمين أكثر وأقدر أنا كمان أخليه سعيد قد ما هو بيخليني مبسوطة في حياتي ، أخيرا بطلب دعواتكم لينا واحنا بنعيش واحدة من أسعد مراحل حياتنا وينستعد نستقبل أول مولودة لينا ان شاء الله .
