مصطفى بكري: «احنا مرينا بمراحل صعبة ودقنا المر.. لكن لازم نقف بكل قوة مع بلدنا»
أكد الإعلامي والكاتب الصحفي مصطفى بكري ضرورة التمسك بالدولة المصرية ومؤسساتها والحفاظ على أمن واستقرار البلاد، مشيرًا إلى أن مصر مرت بمراحل صعبة خلال السنوات الماضية، وشهدت خلالها سقوط شهداء من الجيش والشرطة دفاعًا عن أمن الوطن واستقراره.
وقال مصطفى بكري عبر برنامجه “حقائق وأسرار”: «إحنا مرينا بمراحل صعبة، ودقنا المر في يوم من الأيام، ما إحنا شفنا بلدنا بتتعرض للفوضى، لولا الجيش المصري من 2011 وهو واقف، لولا الشرطة المصرية اللي استُهدفت من الخونة والمتمردين، لكنها تماسكت ورجعت».
وأضاف: «شفنا شهداء الشرطة بيسقطوا، وشفنا شهداء الجيش بيدفعوا التمن، عشان مين؟ عشانك، عشان أمنك، عشان استقرارك، عشان البلد دي تبقى واقفة».
وأوضح بكري أن ما شهدته دول أخرى من انهيار وفوضى يؤكد أهمية الحفاظ على استقرار الدولة، قائلًا: «في حين إن كل البلاد اللي اتعرضت لما حد ضاعت وما بقتش قادرة ترجع مرة أخرى، انهارت وبقت واقفة وهي في حالة انهيار، مش قادرة تمسك نفسها، اتقسمت وتعبت وضاعت».
وتابع: «إحنا لازم نقف بكل قوة مع بلدنا، سيبكم عن الخونة، سيبكم عن المتمردين اللي عاملين نفسهم النهارده بيتكلموا باسم الشعب المصري، والشعب المصري منهم بريء».
وأشار إلى أن الشعب المصري، بحسب وصفه، عانى خلال فترة الفوضى من أحداث دامية واستهداف للمؤسسات، قائلًا: «الشعب المصري هو اللي شاف عياله بتترمي من فوق، الشعب المصري هو اللي شاف أهله بيضربوا بالنار، الشعب المصري هو اللي شاف مؤسساته بتتحرق، الشعب المصري هو اللي شاف الفتن والأوضاع الصعبة».
وأضاف: «إنتوا نسيتوا؟ نسيتوا في يوم من الأيام لما طلعنا في 30 يونيو وحملنا أرواحنا على كفنا، وجيشنا وقف معانا، والسيسي خد القرار في أصعب فترة تاريخية، ما سكتش، ما قبلش بكل الإغراءات، ما قالش بكرة وبعده»، وتابع بكري: «وقف بكل قوة وحماس»، مؤكدا أن مصر واجهت خلال تلك الفترة تحديات كبيرة.
