هاجر الشرنوبي تستقبل عامها الجديد: "اللي هيدوم بس السيره وعملك الطيب"
احتفلت الفنانة هاجر الشرنوبي بعيد ميلادها الذي يوافق اليوم، وقد وجهت لنفسها ولجمهورها رسالة خاصة، وذلك من خلال منشور عبر حسابها الرسمي على موقع تبادل الصور والفيديوهات إنستجرام.
هاجر الشرنوبي تحتفل بعيد ميلادها
حيث علقت هاجر الشرنوبي قائلة: "النهارده هبتدي سنه جديده من عمري، بعد الحمدلله يارب علي كل عطاياك، الحمدلله علي كل حاجه وحشة، الحمدلله علي كل حاجه حلوة، عاوزة أقول شوية حاجات إكتسبتها في رحلتي السنادي السنادي بقيت أهدي شوية، وعندي نظرة مختلفة لكل حاجة، يمكن كل جيلي والجيل اللي أكبر مني أدرك إن السنين بتجري بسرعه والوقت بقي بيطير فخلي بالك مافيش حاجه دايما اللي هيدوم بس السيره وعملك الطيب وده اللي شفتو ف اللي ماتو، كمان مافيش أي حاجه ف الدنيا تستاهل الزعل انا يمكن الزعل أكل من عمري كتير وانا بس اللي خسرت فمتزعلوش او ماتعيش الحالة دي كتير علشان ماتحبكش وتحبها وحط نقطه وعيش ياجدع، كمان الصحة ثم الصحة ثم الصحة خلي عندكم إدراك من بدري بدري انكم تهتمو بصحتكم علشان دي الوحيده اللي لو خانتك يبقي علي الدنيا السلانكاتية، دايرتك الصغيرة أهم وأغلي ماتمتلك حافظ عليها وإديها حبك ووقتك علي أد ماتقدر ونحط هنا قلوب كتيررر وخرزة زرقا، رزقك هيجيلك هيجيلك ولو قاعد جوه سريرك بس ماتبقاش متواكل ياحلو خليك جدع كده وإسعي، انا اللي أقصده ان مافيش حد بإيده يقطع عيشك أو يفيدك إلا بأذن الله
( إسعي ياعبد ) علشان يكونلك كيان وقيمة، كمان اهم حاجه بعيشها ونفسي كل الناس تعيشها خليك حقيقي كون إنت زي ماانت واللي عاجبه عاجبه واللي مش عاجبه يشد ف حواجبه، خليك دايمآ وابدآ علي الله وإستعين بالله واعرف إنها كام ساعه وماشين ومافيش ولا حاجه مستاهلة".
آخر أعمال هاجر الشرنوبي
في سياق آخر، شاركت الفنانة هاجر الشرنوبي في مسلسل درش مع النجم مصطفى شعبان، والذي عُرض في مسوم رمضان الماضي، وجمعها بـ مصطفى للعام الثاني على التوالي بعد مسلسل حكيم باشا في رمضان 2025.
مسلسل درش، يشارك في بطولته بجانب مصطفى شعبان، كلًا من سهر الصايغ، لقاء الخميسي، طارق النهري، محمد علي رزق، عايدة رياض، رياض الخولي، سلوى خطاب، هاجر الشرنوبي، غادة طلعت، جيهان خليل، أحمد فؤاد سليم، بينما تظهر ميرهان حسين في العمل ضيف شرف، والمسلسل تأليف محمود حجاج وإخراج أحمد خالد أمين، وتدور أحداثه في إطار اجتماعي شعبي.
