فضل متعلق بحاجة مكسورة… واتكسر معاها
كان فاكر إن الحب يعني تمسك وخوف من الفقد كان شايف إن اللي يتمسك بيه للنهاية هو اللي بيكسب.
بس مافهمش وقتها إن مش كل حاجة نتمسك بيها تستاهل وإن في حاجات لو ما سبتهاش في وقتها… بتسحبك معاها للنهاية.
هو كان ماسك في حلم قديم،في صورة قديمة،في وعد اتكسر من زمان وهو مش راضي يشوف.
كان كل ما الحاجة تتكسر أكتر، هو يتمسك بيها أكتر.
يمكن خايف، يمكن مش مصدق، يمكن مش مستعد يواجه الفراق.
بس اللي ماكانش واخد باله منه…
إنه مع كل يوم بيعدي، بيتكسر هو كمان معاها، حتة حتة.
التعلق مش حب، التعلق ضعف وخوف من الوحدة،التعلق بيخليك تعيش على ذكريات، على أوهام، على أمل كداب.
وبيخليك تنسى نفسك، تنسى إنت مين، تنسى تستاهل إيه.
في حاجات في حياتنا، لازم نعرف إنها خلصت، مهما وجعتنا، مهما تعودنا عليها،
لازم نقول لنفسنا: كفاية.
لأن التمسك بحاجة مكسورة،
مش بيصلحها…بالعكس بيكسرها .
وفي يوم، لما بص حواليه وما لاقاش نفسه،
ولا حلمه، ولا روحه، فهم متأخر…إنه ماكانش لازم يخسر نفسه عشان حاجة كان لازم يسيبها من زمان.
في النهاية:
خليك فاكر…
اللي اتكسر، اتكسر.
ومهما حاولت تلزقه، عمره ما هيرجع زي ما كان.
واللي بيحبك بجد، مش هيكسرك، ومش هيخليك تتمسك بوهم.
سيب اللي بيكسر قلبك، وخليك جنب اللي يرممك، مش يكملك… لأنك كامل أصلا.
خليك فاكر انت مش هتكون حب مؤقت… ولا وجع دائم.
