بعد اختفاءها لسنوات.. فريد النقراشي يفجر مفاجأة: "دينا حرب ماتت أم لا"
كشف الفنان فريد النقراشي عن مفاجأة صادمة، خاصة بعد تداول أنباء عن وفاة الفنانة دينا حرب، ليؤكد فريد النقراشي أنها مازالت على قيد الحياة وتعيش في لبنان، وقد روى فريد النقراشي تفصايل آخر مكالمة جمعته بها من خلال منشور عبر حسابه الرسمي على موقع التواصل الإجتماعي فيسبوك.
دينا حرب تعيش في لبنان
وقال فريد النقراشي معلقًا: “دينا حرب ماتت وألا لأ، للي مش فاكر الممثلة اللبنانية (دينا حرب) هي اللي كانت مع محمد فؤاد في فيلم (غاوي حب) وشاركت في فيلم (45 يوم) وفيلم حلم العمر، وأمن دولت، وجدو حبيبي .. وغيرها، ولو دخلت وكتبت أسمها على Google هيطلعلك تاريخ ميلادها وتاريخ وفاتها، لكن المفاجأة بقى من كام يوم لقيت (دينا حرب) بتكلمني من لبنان وهي عايشة هناك حاليا مع أسرتها، أيوه دينا (المرحومة) اللي خبر وفاتها منتشر اتصلت بيا وكانت متضايقة جدا ومش فاهمة ليه خبر موتها (وهي عايشة) منتشر بالشكل ده، أيوه زي ما أنت سمعت هي عايشه بالرغم زي ما قلتلك لو كتبت على محرك البحث Google إسمها هيطلعلك تاريخ ميلادها وتاريخ وفاتها".
الحقيقة وراء نبأ وفاة دينا حرب
واستكمل فريد النقراشي حديثه موضحًا: “هي كانت مستغربة ومش فاهمة ومتضايقة جدا وحاسه إن أكيد فيه حد ورا الإشاعة دي، بس مش عارفه ليه يطلع عليها إشاعة بالشكل ده، وليه تتحول لمعلومة رسمية تتكتب على كل المواقع بمجرد أنك تكتب اسم دينا حرب، ولما دورت أكتشفت عبث السوشال ميديا إللي إحنا بقينا عايشين فيها وبيها، فيه خبيرة تجميل ليها نفس الأسم (دينا حرب) وماتت مخنوقة الله يرحمها نتيجة تسرب غاز في منزلها، وعشان الصحافة الالكترونية عندنا مش كل اللي بيشتغل فيها بيتحرى الدقة راحوا مشيرين صورة الممثلة (دينا حرب) بدل خبيرة التجميل وقالوا إنها ماتت مخنوقة بنفس تاريخ وفاة خبيرة التجميل، والخبر انتشر على المواقع وخده مواقع كتير منها ويكيبيديا والسينما كوم وغيرهم كتير، شيء مؤلم وجارح أن كل الناس تتداول خبر وفاتك وتكتبه وتوثقه وأنت على قيد الحياة حي ترزق، ياريت نتحرى الدقة بالذات في المعلومات اللي من النوع ده قبل ما نكتبها، ورجاءا تصحيح الخطأ (دينا حرب) الممثلة عايشة وبصحة جيدة وربنا يديها طولة العمر، معلش يا دينا ألف مليون سلامة عليكي من الموت وربنا يديكي طولة العمر”.
