إحنا في خيبة كبيرة.. هند سعيد صالح تروي موقف مؤثرًا عن أهمية الصلاة
تحدثت هند ابنة الفنان الراحل سعيد صالح عن موقف مؤثر، يؤكد على أهمية الصلاة.
وكتبت هند سعيد صالح عبر حسابها بموقع فيسبوك: “الصلاة تتأجل.. الصلاة ممتدة للآذان اللى بعده.. الصلاة ليها مكان.. عايزة أحكى حادثة حصلت وأنا طالبة فى المعهد سنة 1999.. معلش استحملوني.. مشروع سنة تالتة معهد و كان إخراج معتز التوني ومونتاجي مش فاكرة اسمه بصراحة بس كان اسمه شجرة التوت ورقة التوت والله ما فاكرة.. التصوير كان فى لوكيشن على ترعة المريوطية.. أنا ومجموعة من الزملاء في المعهد روحنا زيارة لموقع التصوير وباركنا وهنينا وانبسطنا”.
وأضافت: "بعد العصر حسيت ان المغرب قرب و الليل على وشك قررت انا و جزء من صحابى نمشى لأن وقتها مكانش فيه العمار ده كله و كانت فعلا ترعة و مزارع وطريق ضيق اتجاهين و حاجة آخر غلب.. وأنا في العربية مستنية باقي الزملاء اللي هايركبوا معايا بضرب بعينى بعيد شوية لقيت ٢ فني كاميرا او اضاءة مش فاكرة ( عصام وربيع ) واخدين جنب وواقفين بيصلوا العصر.. فضلت سرحانة وعيني معاهم مش قاصدة اتفرج عليهم لحد ما خلصوا صلاة
صورتهم بيصلوا محفورة فى دماغى لحد النهاردة مع انه تصرف عادى جدا".
وأكملت: "جم باقى الزملاء وركبنا و توكلنا على الله على بيوتنا.. ساعتين زمن و جالنا خبر ان باقي كرو التصوير و هما راجعين عملوا حادثة موت على طريق المريوطية.. ناس الحمد لله خدوش بسيطة.. ناس اتحجزت في مستشفى الهرم شهور مابين عمليات وعناية مركزة.. وعصام وربيع توفاهم الله
وكلهم فى نفس العربية سبحان الله.. أنا بس بحاول اتخيل لو كان عصام وربيع الله يرحمهم أجلوا الصلاة عشان مايعطلوش التصوير.. بس كدة الحكاية خلصت
احنا في خيبة كبيرة أقسم بالله وآسفة على الإطالة".
