أحمد مجدي: رحيلي عن الزمالك أكبر صدمة في حياتي ولا أعرف الأسباب
تحدث أحمد مجدي لاعب الزمالك الشاب عقب رحيله عن القلعة البيضاء رسميًا وقبل انتهاء فترة القيد بأيام قليلة، معربًا عن حزنه العميق بسبب خروجه من نادي الزمالك
وقال مجدي:بقالي 14 سنة داخل نادي الزمالك. دخلت النادي وأنا صغير بعد ما روحت الاختبارات، وعملت أكتر من 10 اختبارات، في كل مرة كنت بروح وأنا عارف إن ممكن أمشي، لكن كنت واثق في ربنا، والحمد لله اتقبلت من غير أي واسطة. وطول عمري في الكورة، لا كان ليا واسطة ولا اعتمدت على أي حد، غير توفيق ربنا ثم مجهودي.
وتابع"خلال الـ14 سنة لعبت في كل المراحل السنية، وتشرفت بتمثيل منتخب الشباب، واتصعدت للفريق الأول مع الكابتن جوزيه جوميز،لكن للأسف، قبل القيد بأيام قليلة، اتبلغت إني مش هكمل مع النادي.
وأكمل"الموسم اللي فات، فجأة اتقال لي إن عندي مشكلة صحية ومحتاج أعمل أشعات، رغم إني عمري ما اشتكيت من أي حاجة، ولا حسيت بأي أعراض. فضلت حوالي 6 شهور بعمل فحوصات وأشعات بسبب حاجة في الآخر طلعت مش موجودة أصلًا، وضاع عليا موسم كامل كنت مستنيه عشان أثبت نفسي مع الفريق الأول.
وزاد"وفي النهاية، جبت تقرير من رئيس قسم القلب بجامعة القاهرة، وهو نفس الدكتور اللي النادي طلب مني أكشف عنده، وأكد إن حالتي سليمة تمامًا، ومفيش أي مانع من ممارسة كرة القدم.
رغم كده، النادي رفض أكتر من عرض جالي من وقت تصعيدي للفريق الأول، وكان دايمًا الرد إن “إنت ابن النادي ومستقبل النادي”.
واختتم "طوال فترة الإجازة كنت بتواصل مع النادي عشان أعرف موقفي، ولو مفيش نصيب كنت أشوف مستقبلي في مكان تاني قبل ما الأندية تقفل قوايمها. لكن في كل مرة كان الرد إني مستمر مع الفريق.
