المنتج محمد رشيدي: طالبت بوجود سيستم لإيرادات الأفلام واتحاربت بسبب كده
علق المنتج محمد رشيدي على أزمة تغيير الإيرادات.
وكتب محمد رشيدي عبر حسابه بموقع فيسبوك: "على مدار الأسابيع اللي فاتت التزمت الصمت في أكتر موضوع أنا كنت بحاربه وهو الإيرادات وكنت أول واحد اتكلمت على أنه لازم وجود سيستم للإيرادات، واتهموني كتير أوي إني بفتعل مشاكل وصدامي وببوظ الصناعة وهري كتير أوي، ولدرجة إني بدأت اتحارب في شغلى من ناس سموا نفسهم كبار (الشغلانة) وأنا مع كامل احترامي الشديد ليهم شايفهم كبار فعلا (بس في السن) والناس دي وصلت إنها تكلم كل ممثل هيشتغل معايا قبل ما يصور يحاولوا يقنعوه ويخوفوه أنه لو اشتغل معايا هيدمروا إيراداته وانهم هم المتحكمين في الإيرادات والرزق (استغفر الله العظيم)".
وأضاف رشيدي: “وحق الله كل الممثلين طلعوا رجالة و صوروا ولا ركزوا في الكلام الفاضي ده وكان رد الله أقوى بكتير أوي، فينزلوا بفيلمين قصاد بعض والفيلمين يتزور إيراداتهم لأنهم ببساطة مش هينفع أبدا يعترفوا انه مش بايديهم وده اللي صوتي اتنبح وبقوله من أول يوم في الشغلانة دي”.
وتابع: “عايز أأكد حاجتين مهمين جدا أن الممثلين ملهومش أي ذنب فأي إيرادات وصلتلهم غلط، والأهم إني للأسف حاولت كتير اسكت ولكن زي ما انتوا عارفين الطبع يغلب التطبع وأنا مبعرفش اسكت عن الحق خصوصا لما الكدب بيزيد مبستحملش”.
وأردف:"دي الايرادات الأصلية المظبوطة وأي حاجة غير كده هري وعلى مسئوليتي الشخصية، ولو في فروق هتبقى فروق تافهة جدًا لا تذكر واللي عايز يفوق وضميره يصحى بما يرضى الله ربنا يجازيه خير، واللى غروره ومرضه النفسي هيفضل سايقه ربنا يهديه ويشفيه رجاء اخير بكل ود واحترام اتقوا الله وكل واحد يبص فى ورقته والرزق بايد ربنا فقط ومحدش يدعى الالوهيه على الارض".
