«رامز جلال السبب».. بيومي فؤاد: زعلت من نجمة لأنها اتكلمت عني وحش
كشف الفنان بيومي فؤاد عن كواليس خلاف سابق بينه وبين النجم رامز جلال، قائلا: «أنا في البداية طلعت في برنامج رامز في أحد المواسم يعني، وبعدين لما شفت الحلقة زعلت جدا بسبب المقدمة لأنه فضل يتريق عليا وعلى شكلي ولبسي وده حصل قدام أولادي وأبويا وأنا زعلت فعلا من مقدمة الحلقة».
برامج رامز سبب في خلاف بينهم
وأضاف الفنان بيومي فؤاد، خلال استضافته في بودكاست «ابن كارك» مع الإعلامي كريم خطاب: «بعد الحلقة رامز اتصل بيا وأنا مردتش من كم الحزن اللي كان جوايا منه.. أنا لما بزعل من حد مش بحب اتكلم معاه علشان مش عايز أحرج حد، لكن لما هديت عادي الموضوع عدى».
وتابع بيومي فؤاد مازحا: «حاليا رامز هو اللي زعلان مني لأني اعتذرتله عن الظهور في البرنامج بتاع موسم رمضان».
وأدرف الفنان بيومي فؤاد أنه تعرض لموقف مشابة مع أحد النجمات، قائلا: «أنا اتعرضت لموقف شبه ده مع نجمة شهيرة اتكلمت عني بشكل وحش وكانت جايه تعتذرلي لكني مقدرتش اتكلم معاها لأني كنت زعلان منها جدا ومش بحب أحرجها».
وخلال الحلقة تطرق للحديث عن ظهورة المنتشر في الأعمال الفنية، قائلا: «أنا في سنة كنت بشارك في 12 عمل مع بعض ومتحرقتش علشان نيتي كانت صافية جدا.. يعني مثلا كنت بطل في عمل ومساعد في عمل وكومبارس في عمل.. لكن مع الظهور الكتير ده متحرقتش».
البداية على مسرح الجامعة
كما كشف بيومي فؤاد، عن بداياته في عالم التمثيل، مؤكدا أنه بدء التمثيل على مسرح الجامعة، عندما كان يدرس في كلية فنون جميلة، مضيفا إلى أنه استكمل رحلته في عالم التمثيل من خلال مركز الإبداع الفني تحت إشراف المخرج المسرحي خالد جلال.
وأضاف بيومي فؤاد: «عملت أكثر من مسرحية لحد 2011 مثلا بدأت اتطلب في أعمال فنية في أدوار صغيرة مثلا لمسلسل أو فيلم، لأن في بدايتي الأدوار كانت بتتعرض عليا مش بروح لحد.. ودي خيبة لأن الكاستينج مهم ومش غلط».
وأشاد بيومي فؤاد بكل فنون التمثيل التي تعلمها في مركز الإبداع الفني، قائلا: «كان أي حد لما يسمع إني خريج مركز الإبداع الفني كان بيتعامل معايا كأني خريج معهد الفنون المسرحية».
