نادر عباسي: المنافسة في أوروبا لا تقارن.. وإثبات نفسك يحتاج مجهودا مضاعفا

قال المايسترو نادر عباسي إن وجود أي موسيقي مصري في الخارج، خاصة في مجال الموسيقى الكلاسيكية والأوبرا، يمثل تحديًا كبيرًا، موضحًا: «زي وجود أي حد في الخارج، بالذات في مجال ما هوش مجالنا، ده مجالهم يعني الموسيقى الكلاسيكية والموسيقى العالمية والأوبرا وكل ده، ده إحنا هنا بندرس في الكونسرفتوار موسيقى عالمية، فهو مجال أوروبي، لكن في نفس الوقت بقول مدام هو مجال عالمي ومصر جزء من العالم فهو برضو مجالنا».

أوروبا بها مئات العازفين لكل آلة.. وصعب تثبت وجودك

وأضاف «الدمرداش»، خلال لقاء ببودكاست ضيفي مع معتز الدمرداش على قناة «الشرق»: «لما بتفرج على كوريا والصين وأمريكا اللي هو برضو مش مجالهم لأن الموسيقى الأوروبية نوعا ما، هم نجحوا جدا فيها، فعشان كده بنسميها الموسيقى العالمية، لأن هي أي حد من العالم دي لغة العالم كله بيتكلمها».

وأوضح نادر عباسي أن التحدي الحقيقي يبدأ عند محاولة إثبات الوجود، قائلا: «إنك تثبت وجودك بقى صعب، يعني لو أنا مثلا هنا في مصر عازف لآلة معينة بلاقي زمايلي في الدراسة ممكن يبقوا 2 أو 3، لكن لما بخرج برا بلاقي إن فيه مئات العازفين لهذه الآلة، آلاف طبعا في أوروبا كلها، لكن في البلد اللي أنا فيها فيه مئات، عشان تثبت وجودك في المجال ده وفي الآلة دي وفي بلدهم طبعا بتاخد مجهود أصعب عشرات المرات».

وتحدث نادر عباسي عن أبرز الصعوبات التي واجهته خلال رحلته في الخارج، مؤكدا أن التحديات لم تكن فنية فقط، وإنما شملت اختلاف اللغة والثقافة والمجتمع، قائلا: «كل اللي حضرتك قلت، أول حاجة اللغة الجديدة، أنا رحت جنيف في سويسرا، فدي بتتكلم فرنساوي، وأنا ما كنتش بكلم فرنساوي، فبالتالي لغة جديدة علي، مجتمع جديد، عادات وتقاليد مختلفة تماما، ده سيبك بقى من الدراسة، أنا بكلم كل اللي حواليك».