شبيه مروان عطية: الجمهور بيجري ورايا في الشارع.. والشبه ده من صغري

استضافت الإعلامية سارة مكي في بودكاست "ملكة التريندات" على موقع “نيوز رووم”، أحمد، الشاب الذي أصبح "ترند" على السوشيال ميديا بسبب الشبه الكبير بينه وبين لاعب النادي الأهلي مروان عطية.

الموضوع عرفته بالصدفة

بدأ أحمد حديثه موضحا كيف اكتشف الشبه قائلا: "والله هي صدفة جدا، أنا في البداية كنت بحلق عادي جدا، فطلعت من عند الحلاق لقيت الناس في الشارع بيقولوا إيه ده شبه مروان عطية اللاعب الجديد اللي في الأهلي".

وأضاف: "أنا ما كنتش عارف الكلام ده وما كنتش عارف مين مروان الصراحة. بعد كده الموضوع أفور لأن مروان بسم الله ما شاء الله موهبته زادت جدا في الأهلي وفرق جدا مع النادي وبقى يلعب بشكل أساسي. فمن بعد كده لقيت الجمهور بقى في الشارع بيتكلموا معايا إن أنا هو".

وأكد أنه لم يقصد تقليده: "لا خالص يعني هي جات صدفة وأنا بحلق كده. دي طريقتي من بدري ومن زمان".

بيتصوروا معايا أحسن من مفيش

وعن تأثير شهرة مروان عطية عليه، قال أحمد: "بعد كأس العالم الموضوع فرق. هم بيتمسكوا بأي حاجة جاية من اللعيبة دي. إحنا فرحنا فرحة مهولة فلما الناس بقت تشوفني في الشارع بقوا على الأقل يتصوروا مع حد شبهه أحسن مفيش خالص".

وتابع: "الموضوع فرق جدا لأنهم عملوا إنجاز تاريخي وكابتن حسام عرفنا على العالم كله".

مستحيل أقول إني مروان

وعن تعامله مع الناس قال: "الناس كلها بيبقى ليها احتياج للشهرة كده. في الأول ما كنتش في دماغي خالص.. بعد كده لقيت الناس زيادة عن اللزوم، ممكن أبقى ماشي بالعربية ألاقي الناس بتخبط على الزجاج، ماشي على الدائري ألاقي الناس بتوقف العربية".

وأوضح موقفه: "أنا ما بقولش خالص إني هو. استحالة حد ييجي يتصور معايا وأنا أقول له لأ بقولك أنا مروان. بتصور عادي جدا بس بعدها أقوله لأ خلي بالك عشان أنا مش هو".

موقف طريف في نادي الزمالك

وسرد موقفا طريفا حدث له داخل نادي الزمالك: "مرة الأمن بتاع النادي كله تلم علي مرة واحدة وكانوا هيمشوني من النادي بسبب إن في شباب كتير في النادي اتلموا حواليا وقالوا ده مروان.. الموضوع عمل جدل في 3 دقايق".

وأضاف: "الموضوع فعلا فارق جدا في كل مكان بروحه. حتى لو دخلت مطعم بلاقي الناس أوه بتتصور وبيقولولي أنت أو مش أنت".

أنا كده من صغري ومغيرتش شكلي

وعن إمكانية تغيير شكله، قال أحمد: "هو الشكل هو أنا من زمان كده من صغري.. لو مروان عمل حاجة تليق بشكلي وشخصيتي هعملها".

واختتمت سارة مكي الحلقة بالتأكيد على أن الشبه بين أحمد ومروان عطية أصبح حديث السوشيال ميديا، وأن الجمهور "مش مصدق عينيه" من درجة التقارب بينهما.