«اتكسفوا».. مصطفى سليمان يفتح النار على الغائبين عن جنازة أحمد جلال عبد القوي
تحدث الفنان مصطفى سليمان عن حالة الجدل التي أثيرت بعد تصريحاته بشأن جنازة الفنان الراحل أحمد جلال عبد القوي، مؤكدا أنه قال الحقيقة، ولا يرى سببًا لغضب البعض من حديثه.
غياب الكثير عن جنازة أحمد جلال
وقال مصطفى سليمان: «في ناس اتصلت بيا وزعلانة جدا إني طلعت مداخلة في برنامج، والمذيعة بتسألني عن الفنان الراحل أحمد جلال عبد القوي والجنازة، وقلتلها إني زعلان جدا إن في بعض الفنانين والأصدقاء وزمايله محضروش».
وأضاف: «هو حضرتك زعلان ولا زعلانة ليه؟ دي الحقيقة، كان في وقت كافي جدا لأنهم أجلوا الجنازة من الضهر للعصر، وبعدها خلوها لتاني يوم».
الفنان الراحل كان يستحق التقدير
وتابع: «أحمد كان جدع مع ناس كتير أوي، ويشهد الله على كلامي وفي ناس تشهد على كلامي، مسلسل «الليل وآخره» كان أحمد بيرشح زمايله في الأكاديمية والمعهد بقوة».
وأكد سليمان أن الفنان الراحل كان يستحق التقدير، قائلا: «كان جدع ويستاهل كل خير، مستغرب بس الناس اللي بتكتب، والمخرجين يقولوا يا أحمد أنا كلمتك وكنا هنشتغل مع بعض، طيب كان فين الدعم النفسي اللي المفروض كان ياخده ويستحق؟».
وأضاف: «طبعا ده كلام سوشيال ميديا، وانتوا مش بتعرفوا تعملوا حاجة غير إنكم تكتبوا كلام على السوشيال ميديا».
عيب عليكم اتكسفوا شوية
وأشار إلى أن هناك عددا من الفنانين الذين كانوا قريبين من أحمد جلال عبد القوي لم يحرصوا حتى على نعيه، قائلا: «للأسف في أسماء ونجوم النهارده كانوا واقفين جنب أحمد ولسه بيقولوا يا هادي، كنت متوقع إنهم ينعوه حتى على صفحاتهم، لقيت أعداد محدودة جدا اللي واقفين جنب أحمد».
واختتم مصطفى سليمان حديثه برسالة حادة، قائلا: «عيب.. انتوا بتوعدوا ومش بتنفذوا أي وعد، لا للحي ولا للميت.. اتكسفوا، ونفسي في مرة تصدقوا مع نفسكم، وعايزين تزعلوا ازعلوا بقى براحتكم.. مفيش مشكلة».
