فتاة تستغيث من سائق أوبر: كان عايز يتعدى عليا ولما رفضت شتمني
تداول رواد مواقع التواصل الاجتماعي فيديو لاستغاثة فتاة بعد تعرضها لموقف مخيف أثناء استقلالها سيارة تابعة لإحدى شركات النقل الذكي «أوبر» خصوصا في منطقة التجمع الخامس بالقاهرة، موضحة أن حديث السائق كان غير لائقا، وذلك بعدما حاول تغيير مسار الرحلة.
لابس جلابية وذراعه مبتور
وأضافت الفتاة خلال الفيديو، قائلة: «أنا ربنا انقذني خلصت شغلي في التجمع الساعة 6 ونص الصبح ضربته جالي راجل كبير لابس جلابية ودراعه مقطوع ولما ركبت بصلي لي بصة غريبة بس أنا في الطبيعي أول ما بركب مبتكلمش مع أي سواق وبتلاشى الرغي تماما».
وتابعت: «طلعنا على الطريق لقيته بيشاور لي إني أتكلم معاه وبحكم أنه هو راجل كبير فنزلت السماعات ورديت عليه ولقيته بيسألني انتي ساكنة في المكان اللي خدتك منه أصل أنا باخد زبون كويتي كل يوم من نفس المكان وبيحتاج شقة في التجمع لمدة أيام فرديت وقولتله أنا أسفة مش هعرف أساعد حضرتك»
فتاة تتهم سائق نقل ذكي بالتحرش اللفظي في التجمع
وأوضحت، قائلة: ««وبعد كده لقيته بيدخل من مكان مختلف غير اللوكيشن محدده قالي أنا هوصلك من طريق مختصر وأنا خلاص كنت هموت من التوتر وكنت حاسه إنه هيغمى عليا ومن خلال مجرى الحوار فهمت أنه هو كان عايز الشقة لنفسه عشان يجيب فيها ستات وأما قولتله كده راح متعدي عليا جسديا لدرجة حطيت وشي في الشباك وإيدي على الأوكرا عشان أول ما يفتح قفل الباب هخرج أجري على طول»، متابعة: «فضلت أقول يارب إنقذني وفي الأخر وصلنا لأخر الكوبري ولقيته بيتعدى عليا لفظيا بكلام مسئ وغير مقبول فقومت هربت منه في مكان غير المكان اللي كنت طلباه»
وتفاعل عدد كبير من مستخدمي مواقع التواصل الاجتماعي مع القصة، حيث طالب البعض بضرورة التحقق من الواقعة واتخاذ الإجراءات اللازمة حال ثبوتها، فيما شدد آخرون على أهمية توفير أعلى معايير الأمان للمستخدمين داخل خدمات النقل الذكي.
