هاني شنودة يكشف كواليس اختيار أحمد عدوية لغناء «زحمة يا دنيا زحمة»
تحدث الموسيقار هاني شنودة عن كواليس تعاونه مع الفنان أحمد عدوية في أغنية «زحمة يا دنيا زحمة»، مؤكدا أنه كان يرى أن عدوية هو الأنسب لتقديم الأغنية منذ لحظة تلحينها.
أنا اللي اخترت أغنية زحمة يا دنيا زحمة
وقال هاني شنودة خلال لقاء في برنامج «الستات مايعرفوش يكدبوا»: «أنا بحب صوت أحمد عدوية، وأنا اللي اخترت أغنية زحمة يا دنيا زحمة، وأنا بلحنها كنت حاطط عدوية في دماغي، وكنت عارف إنه فنان هيعرف إن دي حلوة وتتغنى والناس هتعجبها»، وأن المنتج عاطف منتصر عرض عليه مجموعة من الأغاني الشعبية لاختيار واحدة منها، قائلا: «قال لي في دوسيه جوه مليان أغاني شعبي اختار لك واحدة، فطلعت بأغنية زحمة يا دنيا زحمة».
وأضاف: «لما سألني ليه اخترت زحمة بالذات، قلت له الكلام اللي فيها، زي حتة الزحمة والواقع اللي بنعيشه، لأن الأغنية بتنقل حياة الناس».
هاني شنودة: عدوية كان متردد يجيلي بسبب ألحاني الغربية.
عدوية كان خايف يجيلي
وأشار شنودة إلى أن أحمد عدوية كان متخوفا في البداية من الحضور إليه بسبب طبيعة ألحانه المختلفة، قائلا: «عدوية كان خايف يجيلي، لأن ألحاني كلها كانت غربية، وكان بيغني لون مختلف»، وتابع: «كان عنده لحن عند ملحن تاني، فقال له تعالى نروح لهاني شنودة، فقال له: بقى أنت تجيبني عند عمدة الغربي؟».
وأوضح شنودة أنه استقبل عدوية والمنتج عاطف منتصر بعد إقناعهم بالحضور، قائلا: «دخل أحمد عدوية ومعاه السكرتير، وكان لابس شيك جدا، فقلت له هلعب لك اللحن وأنت تاخد الكلام، عشان مش عايزك تاخد طريقتي في الغناء»، وأضاف: «لما اديته ورقة كلام الأغنية قال لي: يا عم هاني أنا والسكرتير مش بنعرف نقرا، فقلت له خلاص هسجلك اللحن وتاخده معاك».
وأكد هاني شنودة أن أغنية «زحمة يا دنيا زحمة» كانت بداية لتقديم لون مختلف من الأغاني التي تعبر عن المجتمع، مشيرا إلى أن فرقة المصريين كانت من أوائل الفرق التي قدمت الأغاني الاجتماعية التي تتناول تفاصيل الحياة اليومية.
