خالد الغندور يعلق على قرار الأعلى للإعلام: «حاسس بظلم.. إيه الغلط اللي عملته؟»

خرج الإعلامي الرياضي خالد الغندور، في مقطع فيديو عبر صفحته الشخصية، معبرا عن استيائه الشديد من قرار المجلس الأعلى لتنظيم الإعلام، الذي تضمن تحذيره ضمن قائمة من الإعلاميين والرياضيين، إلى جانب فرض غرامة مالية على قناة المحور بقيمة 200 ألف جنيه، وإيقاف الإعلامي رضا عبد العال لمدة 4 أشهر.

إحساس كبير بالظلم

وقال الغندور، في مقطع الفيديو الذي نشره اليوم: «أنا طالع بس سريعا كده أقول كلمتين.. الإنسان اللي ما بيحس بالظلم بيبقى زعلان جدا جدا من جواه»، مضيفا أنه تفاجأ بقرار المجلس الأعلى للإعلام، الذي أصدر بيانا تضمن تحذير عدد من الإعلاميين من بينهم خالد الغندور نفسه، دون أن يفهم الأسباب التي أدت إلى ذلك.

مطالبة الأعلى للإعلام بإعادة النظر 

وتساءل الغندور قائلا: «خالد الغندور إيه اللي عمله في تغطيته الإعلامية؟ وإيه اللي عمله بره الكود الإعلامي المتعارف عليه؟»، مستنكرا فكرة توجيه تحذير له دون توضيح المخالفة التي ارتكبها، مطالبا المجلس الأعلى للإعلام بإحالته للتحقيق، قائلا: «أتمنى من المجلس الأعلى للإعلام برئاسة المهندس خالد عبد العزيز يحولوني للتحقيق، يقولوا لي: تعال يا خالد عايز أقولك أنت عملت 1، 2، 3».

وأكد الغندور أن تغطيته الإعلامية لكأس العالم كانت مشرفة، مشيرا إلى أن قناة المحور خرجت مرتين في الساعة 6 صباحا لمتابعة مباراة إيران مع الجماهير في الشوارع والكافيهات، كما كانوا موجودين في مباراة أستراليا، ووثقوا فرحة الجماهير بالانتصار.، مضيفا: «عملنا شعر للفرقة لحسام حسن وللعيبة، وكنا في ظهر محمد هاني ومصطفى شوبير وإمام عاشور وكل اللعيبة».

استبعاد مصطفى محمد

وأوضح الغندور أن ما قام به لم يخرج عن كونه تحليلا فنيا، قائلا: «لو أنا انتقدت استبعاد مصطفى محمد، أو انتقدت ضم حمزة عبد الكريم وهو لسه مش جاهز إنه يكون دولي في كأس العالم، أو قلت إن محمد عبد المنعم مش جاهز بقاله سنة وثلاثة شهور ما بيلعبش، ده تحليل فني يا جماعة، تحليل فني، أنا مش بصدق والله».

وأضاف: «مش معقولة هيئة الرصد في الإعلام شافت إن خالد الغندور مش ماشي صح عشان انتقد تغييرة، أو كان لازم حسام عبد المجيد ينزل فمنزلش»، متسائلا: «هل أنا بتطول على حد؟ هل أنا بقلل من قدر مدير فني؟ أنا مش فاهم».

دعم قوي لمنتخب مصر

وأكد الغندور أنه طوال الفترة الماضية كان داعما للمنتخب الوطني، وقال: «ده أنا عملت شارع لحسام حسن، ده أنا أثنيت على حسام حسن وإبراهيم والجهاز الفني بالكامل ولبست تيشرت المنتخب 15 مرو، ده أنا كنت في ظهر محمد هاني وهو بيجيب جونيل، كنت في ظهره في الوقت اللي الناس كانت ضده».

ووجّه الغندور رسالة إلى المجلس الأعلى للإعلام، قائلا: «ياريت جهة الرصد في المجلس الأعلى للإعلام تعرفني إن أنت يا خالد عملت واحد اتنين تلاتة عشان كده تم تحذيرك، ولو عملت كده تاني هوقفك»، مضيفا: «بدل ما يتم تكريمي على الجهد اللي عملته أنا وقناة المحور، والجهد اللي عملته ونزلنا للشارع ومع الناس وفي العربيات ودعمنا للمنتخب».

واختتم الغندور حديثه قائلا: «الواحد حاسس بالظلم غير طبيعي بجد.. أنا مش فاهم إيه اللي حصل، هل ده اللي أنا شايفه بس، إني قلت إن مصطفى محمد كان يستاهل، وإن حمزة عبد الكريم لسه بدري، وإن محمد عبد المنعم مش جاهز؟ ده اللي أنا شوفته اللي أنا قولته»، مضيفا: «ماتش إيران آخر ربع ساعة كنت مستاء من أداء الفرقة، وقلت إن أحمد فتوح كان مفروض يعمل تغييرات بدري أوي، ثلاث ساعة، وأحمد فتوح قعد في الملعب مصاب ما بيعرفش نعمل تغييرات كلها مرة واحدة، ده انتقاد فني عادي جدا».

واختتم الغندور مناشدا المجلس الأعلى للإعلام بالكشف عن الأسباب، قائلا: «ياريت جهة الرصد في المجلس الأعلى للإعلام تعرفني إن أنت يا خالد عملت واحد اتنين تلاتة عشان كده تم تحذيرك، ولو عملت كده تاني هوقفك، ياريت تقولولي.. سلام عليكم».