عبد الناصر زيدان يفتح النار على وزير الزراعة: «عايزين نعيش جنب الكلاب.. مش نخاف منها»
علق الإعلامي عبد الناصر زيدان على الجدل المثار بشأن ملف الكلاب الضالة، منتقدًا أداء وزارة الزراعة، ومطالبًا بتحركات عملية على الأرض بدلًا من الاكتفاء بالبيانات.
وكتب زيدان، عبر حسابه على منصة إكس: «أنا نفسي أعيش جنب الكلب، وزارة الزراعة ليس لها أي رصيد يُذكر لدى المصريين في ملف كلاب الشوارع؛ لأنها طوال الوقت كانت تسمع وترى ولم تحرك ساكنًا، وكانت في قمة السلبية وعدم القدرة على المواجهة، ولما قالت الدولة كلمتها بعد ما زاد الوضع عن الحد، وتدخل الرئيس عبد الفتاح السيسي لإيقاف فتيل الفتنة المشتعلة بين الناس».
أضاف: «فتنة من صنع أصحابها، وكل المصريين أبرياء منها، كل المصريين متفقون على الإنسانية والرفق بالحيوان، والوحيدون الذين تخلوا عن ذلك كانوا المسؤولين في وزارة الزراعة والطب البيطري في كل محافظات مصر، هم من صنعوا الخلاف، وكبر على أيديهم وبقي فتنة؛ لأنهم تخلوا عن دورهم تجاه القضية، وما زالوا لا يعرفون ماذا يفعلون، لازم يا بتوع وزارة الزراعة تنفذوا ما جاء في البيان من أول دقيقة بعد صدوره، عشان الناس كلها تسكت وتصدق إنكم هتعملوا حاجة المرة دي يا معالي الوزير».
تابع: «الخط الساخن اللي أعلنتم عنه طوال الساعات الماضية بعد صدور البيان لا يرد على أحد، وردودكم على عدم رد المنقذين في الطوارئ غير منطقية، وبيانكم صدر دون توضيح آليات تنفيذية واضحة على الأرض تطمئن كل المصريين، سيبك من اللي طالع يهلل لك على البيان أو يهاجمك عليها المصريون الغلابة في بلدنا لا يعرفون هؤلاء ولا هؤلاء. أهلنا عايزين يعيشوا بأمان من غير ما الكلاب تعضهم أو تعض عيالهم يا باشا».
استكمل: «عايزين شارعًا آمنًا، ومليان كلاب غير مسعورة ولا ضارة، عادي. وعايزين عيالنا ترجع تاني تلعب مع الكلاب في الشوارع، عادي خالص، وعايزين نشوف فعلًا منك، مش مجرد بيانات تسد بها خانة، وصدقني مفيش أحسن من اللي قاله الرئيس. خليك واقعيًا وأمينًا وشفافًا في أي قضية تتصدر لها، ومفيش غيرنا اللي هنساعدك، إحنا الشعب اللي شايل البلد على أكتافه وماشي بها خلف السيسي بكل قوة وواخدها لبر الأمان».
اختتم: «إحنا البسطاء الغلابة والطيبين في مكان. إحنا اللي بنشتغل لمصر بس، ومعندناش أجندات، إحنا بتوعك يا باشا، مش بتوع أي حد، وليس لنا علاقة ببتوع الخناقات، ولا بتوع الجمعيات، ولا بتوع الطبل والزمر وكيد النسوان، يا باشا، إحنا عايزين نعيش «جنب» الكلاب بكل ود وكل حب وانتظرناك سنين لغاية ما قمت من مكانك واتحركت وطلعت لنا بالسلامة «بيان كلاب الشوارع» وصدقني هنصبر تاني، بس خليك صادق معانا عشان ربنا، واتحملوا يا مصريين.. ما جتش على كام ألف عضة كلب تاني».
