أحمد كشري: كنت بخبط في الناس على كوبري قصر النيل بعد توقيع الأهلي

تطرق أحمد كشري، نجم الأهلي السابق، إلى أن انتقاله للمقاولين العرب كان محطة مهمة في مسيرته، قائلا: "الكابتن سعيد الشيني شافني في الاختبارات وخدني نادي المقاولين. أول مباراة ليا كانت فيرود ولبست فانيلا رقم 10 بتاعة بيبو. كنت مضغوط جدا وأبويا بيتفرج عليا لأول مرة".

أكلوني كباب بعد ما جبت جون

وأضاف: "ما مرش ربع ساعة إلا وجبت جون في الترسانة، وفي نهاية الماتش رحت مسجل جون تاني، الماتش انتهى 2-2. والدي كان في المدرج والناس بتقول مين الواد ده.. خدني وراح مأكلني كباب وكان مبسوط، حسيت بيه".

وأوضح أنه صعد للفريق الأول في سن مبكرة، قائلا: "بعد سنتين طلعت الفريق الأول وأنا عندي 16 سنة. لعبت أول مباراة في الدوري الممتاز قدام الأولمبي وكانت مذاعة في التلفزيون. نزلت الشوط التاني وكنت سريع جدا وعندي باور".

رحيله عن المقاولين العرب

وعن رحيله عن المقاولين العرب، قال: "قعدت مع المقاولين شوية وبعدين اتغير الجهاز الفني وقالوا هنجيب أسماء كبيرة. بلغوني إني همشي، وكانت غير متوقعة لأني كنت في منتخب مصر الناشئين وهداف دوري على طول".

وأضاف: "زعلت جدا لأني قعدت 7 سنين في النادي، وكنت وأنا ماشي بملس على جدران النادي".

تألقه مع الشرقية للدخان

وتحدث كشري عن تألقه مع الشرقية للدخان، قائلا: "رحت الشرقية للدخان وخدنا ملعب المقاولين العرب. ده كان ملعبي، وتخيل ماشي من المقاولين ورحت الشرقية وهلعب في ملعب المقاولين. كانت مشاعر غريبة وعايز إثبات ذات".

وأضاف: "لعبنا قدام الصيد والمباراة انتهت 3-0 للشرقية للدخان، أنا اللي جبت الثلاثة. مجلس إدارة المقاولين كان قاعد بيتفرج، هو ده اللي إحنا سبناه؟ الجرايد كانت بتكتب كشري الدخان كسب الصيد، كشري الدخان كسب القناة. كنت الهداف وكنت النجم الأول بتاعهم".

تحقيق حلمه الانتقال إلى الأهلي

وعن تحقيق حلمه بالانتقال إلى الأهلي، قال أحمد كشري: "النادي الأهلي ده حلم خيالي.. الكابتن عامر قال لي النادي الأهلي عايزك.. رحت قابلت المهندس عادل القيعي والكابتن محمد رمضان، وقالوا لي الخواجة عايزه ومعجب بيه وهنمضي 5 سنين".

وأضاف: "قلت لهم موافق على كل حاجة، والكابتن عامر قال لي امضي 10 سنين. رحت ما حدش يعرف من بيتي ولا حد خالص.. أول ما مضيت بقيت مش مصدق إني في النادي الأهلي".

وعن شعوره بعد الانتقال للأهلي، قال: "كنت خايف جدا.. خايف أعرف ألعب جنب النجوم دول؟ أعرف أنافس حسام حسن وفيليكس ووليد صلاح الدين وأيمن شوقي وجورج آرثر؟ هعرف جمهور الأهلي؟ أفرد ما جبتش جول؟"

وأضاف: "خدت بعضي ومشيت من النادي للبيت، ماشي على كوبري قصر النيل وأنا شايف النيل والناس وبخبط في الناس.. دخلت البيت لقيت العيلة كلها متجمعة وسألوني عملت إيه في الأهلي، وما حدش كان يعرف.. أنا كنت طموح جدا وعندي إصرار قوي".