«هو محامي وبيستضعفني».. أم تستغيث بعد 3 سنوات من فراق ابنها: «نفسي طفلي يرجع لمدرسته»

وجّهت سيدة تُدعى كريمة علي محمد استغاثة عبر حسابها على موقع «فيس بوك»، ناشدت خلالها المسؤولين مساعدتها في العثور على نجلها، مؤكدة أنها لم تره منذ ثلاث سنوات بعد أن أخذه والده أثناء إحدى جلسات الرؤية.

وقالت كريمة: «كنت متزوجة من أشرف عمر، وكنت زوجة تانية، وندمانة، رزقني الله منه بطفل، لكنه أخده مني من 3 سنين أثناء الرؤية، وعملت كل الإجراءات، وكل لما بروح مش بلاقي زوجي ولا أخواته، ويقولوا مش بنعرف عنه حاجة».

وأضافت أنها حصلت على الولاية التعليمية، لكنها اكتشفت أن نجلها لا يذهب إلى المدرسة، قائلة: «عملت ولاية تعليمية وجبت ملف الولد وقدمتله، وهو مش بيودي الولد المدرسة، وابني في تالتة، ومحضرش مدرسة، ومعرفش ابني فين».

وأكدت أن والد الطفل تزوج أكثر من مرة بعد انفصاله عنها، مطالبة بتدخل المسؤولين، وقالت: «هو تزوج بعدي مرتين، وعاوزة حد مسؤول يجيبلي ابني، ونفسي أسمع صوت ابني وأشوفه ويكمل تعليمه، أنا معرفش ابني عايش ولا ميت».

وأوضحت أنها كانت تتحمل جميع نفقات ابنها قبل اختفائه، مضيفة: «ابني لما كان معايا كنت متكفلة بكل مصاريفه واحتياجاته، ودلوقتي خطفه من 3 سنين، وكل يوم يتجوز واحدة ويطلق».

وتابعت: «مراته الأولى بتقولي معرفش عنه حاجة، وروحت لمسؤولين كتير ومحدش بيجاوبني، علشان هو محامي، وهو بيستضعفني علشان أنا يتيمة ومليش حد».

واختتمت استغاثتها بمناشدة رئيس الجمهورية وكل من يستطيع مساعدتها، قائلة: «نفسي صوتي يوصل لرئيس الجمهورية وأشوف ابني، ودلوقتي بتهدد بيه، يا إما أتنازل عن حضانته والولاية التعليمية، أو مش هشوفه تاني، مفيش حد يقدر يوصل الفيديوهات بتاعتي لأي مسؤول أو أي برنامج؟ نفسي أشوف ابني، ونفسي أسمع كلمة ماما، أرجوكم، اللي في إيده يساعدني، ياريت ما يتأخرش، لأن عملت كل حاجة ومبقتش عارفة أعمل إيه تاني».