الفنانة جيدا منصور: مسلسل «أندر إيدج» مش أفورة.. ويناقش مشاكل جيل موجود حاليا

تحدثت الفنانة جيدا منصور عن أحدث أعمالها الفنية، وعلى رأسها مسلسل «أندر إيدج»، وتجربتها في تقديم شخصية "هنا" وذلك خلال استضافتها في برنامج "عيش صباحك" على إذاعة “نجوم إف إم”.

وكشفت جيدا منصور عن كواليس ترشيحها للمسلسل، قائلة: "أنا أول ما جالي الدور ما كانش لسه السكريبت كله اتكتب، ففضل عندي أسئلة كتير عن الكاريكتور وعن إيه اللي هيحصل في الآخر، زي دلوقتي كده الناس وهي بتتفرج، ومع الوقت بدأت أشوف العمق بتاع الكاريكتور أكتر".

وأضافت: "حسيتها مختلفة عن أي حاجة أنا عملتها قبل كده، وحسيتها بتتكلم عن جيل كده معين، أو نوع بنات في الجيل اللي موجود دلوقتي، ودي حاجة مش موجودة قوي في التلفزيون وفي السينما الفترة دي، ومفيش تركيز قوي عليها زي ما المسلسل عامل".

سبب موافقتها على المشاركة في العمل

وتابعت موضحة سبب موافقتها على المشاركة في العمل: "فحبيت إنه، خصوصا إن أنا بتعامل مع السن ده كتير، فحبيت إن أنا أكون جزء من إن إحنا نوري الناس الجيل ده بيفكر إزاي، وإيه مشاكله، وإيه الحاجات اللي بيتعرض لها في المدرسة، ونشوف نقدر نقوي البيت مع الأهالي، ونشوف نقدر نحل ده إزاي".

وكشفت جيدا منصور عن استعداداتها لتجسيد الشخصية، مؤكدة أنها حرصت على معايشة الفئة العمرية التي يتناولها المسلسل، قائلة: “أنا بشتغل مع تينيجرز، بشتغل من سن 11 سنة تقريبا أو أصغر شوية لحد 17 أو 18 سنة”.

وأضافت: “فطبعا وقت التحضير كنت مركزة معاهم قوي في الورش، بيتكلموا إزاي، إيه المشاكل بتاعتهم، بيهزروا إزاي، إيه المواضيع اللي مهتمين بيها، وإيه السوشيال ميديا اللي بيتعاملوا معاها أكتر، واهتماماتهم وكل حاجة”، وتابعت: “كنت مركزة معاهم، بس ما كنتش عايشة معاهم، كنت براقب من بعيد لبعيد”.

هل أحداث المسلسل مبالغ فيها؟

وتطرقت جيدا منصور إلى مدى واقعية الأحداث التي يناقشها مسلسل «أندر إيدج»، قائلة: “أنا كان نفسي أبقى مقتنعة إن المسلسل مأفور، بس للأسف هو مش مأفور".